ယူကရိန်းနိုင်ငံ မာရီယူပိုမြို့မှာရှိတဲ့ အာဇိုစတယ်သံမဏိစက်ရုံဝင်းထဲမှာ ပိတ်မိနေတဲ့ အရပ်သားတွေကို ကုလသမဂ္ဂနဲ့ နိုင်ငံတကာကြက်ခြေနီအသင်းတို့ရဲ့ အစီအစဉ်နဲ့ မေ ၁ ရက်နေ့က ကယ်ထုတ်နိုင်ခဲ့ပါတယ်။

အာဇိုစတယ်စက်ရုံဝင်းကို ရုရှားတပ်တွေ ဝိုင်းထားတာ ရက်သတ္တပတ်တွေ ကြာနေပြီး ကတုတ်ကျင်းထဲမှာ ယူကရိန်း စစ်သားတွေရော၊ အရပ်သားတွေပါ ပိတ်မိနေတာပါ။

ရုရှားတပ်တွေဟာ မြို့ကို တိုက်ခိုက်နေတာ ၂ ပတ်နီးပါး ရှိနေပြီဖြစ်လို့ မြို့ဟာလည်း မြို့ပျက်ကြီးလို ဖြစ်နေပါပြီ။

လူအသေအပျောက်စာရင်း အတိအကျကို မသိရဘဲ ထောင်ပေါင်းများစွာဟာ အစားအစာ ပြတ်လပ်တာ ကြုံနေရပါတယ်။ 

မြို့ရဲ့အစိတ်အပိုင်း တော်တော်များများကို ရုရှားတပ်တွေ ဝင်ရောက်သိမ်းပိုက်ထားတာကြောင့် ယူကရိန်းဘက်က တိုက်ခိုက်ရေးသမားတွေနဲ့ အရပ်သားတွေဟာ စက်ရုံ မြေအောက်ခန်းထဲမှာ ပုန်အောင်းနေခဲ့ကြတာပါ။ 

ဒီစက်ရုံဟာ ဆိုဗီယက်ခေတ် စတာလင်လက်ထက် တည်ဆောက်ထားတာဖြစ်ပြီး မြေအောက် ဘန်ကာတွေနဲ့ ဥမင်လှိုင်တွေပါ တည်ဆောက်ထားခဲ့ပါတယ်။ 

အခု စက်ရုံဝင်းထဲကနေ ကယ်ထုတ်လာတဲ့ ပထမအသုတ်မှာ အယောက် ၁၀၀ မှာ ကလေးတွေ လည်း ပါဝင်ပါတယ်။

သူတို့တွေ ယူကရိန်းအစိုးရက ထိန်းချုပ်ဆဲဖြစ်တဲ့ အနောက်မြောက်ဒေသက ဇာပူးရီယီရှာ မြို့ဆီကို ဒီနေ့ ရောက်ကြမယ်လို့ ယူကရိန်းသမ္မတ ဇီလန်းစကီးက ပြောပါတယ်။