မကွေးတိုင်း၊ ဂန့်ဂေါမြို့နယ်မှာ ဇွန် ၂ ရက်က စစ်ကောင်စီစစ်ကြောင်းနဲ့ ယောဒေသကာကွယ်ရေးတပ်ဖွဲ့ (YDF) တို့ တိုက်ပွဲဖြစ်ပွားပြီး စစ်ကောင်စီဘက်က အရာရှိကြီး တယောက်အပါအဝင်  ထိခိုက်သေဆုံးဒဏ်ရာရသူတွေရှိခဲ့တယ်လို့ YDF ကနေသိရပါတယ်။

ကျောမြို့ ကပစ(၂၃)မှာတပ်စွဲထားတဲ့ စစ်ကောင်စီကား အစီး ၆၀ နဲ့ သံချပ်ကာကားတွေပါဝင်တဲ့ စစ်ကြောင်းဟာ ဂန့်ဂေါမြို့ဘက်ကို ဦးတည်ထွက်ခွာလာလို့ YDF က စောင့်ကြိုပြီး ၂ ကြိမ်တိုက်ခိုက်ခဲ့တာလို့ YDF ဗဟိုရဲ့ ပြန်ကြားရေးတာဝန်ခံက ပြောပါတယ်။

“ပထမတိုက်ပွဲကတော့ မနက် ၈နာရီလောက်မှာဖြစ်တာဗျ။ ကျောမြို့ ကပစ(၂၃)ကနေ ထွက်လာတဲ့ စစ်(...)ကား ၈ စီးကို ပုံတောင်အဆင်းမှာ YDF တပ်ရင်း(၁၃)က မိုင်းတွေ လက်နက်ကြီးတွေနဲ့ ပစ်ခတ်တိုက်ခိုက်ခဲ့တာဗျ။ အဲဒီယာဥ်တန်းက နောက်ဆုံးကား ၂စီး ပျက်စီးခဲ့ ပြီး စစ်(...) ၁၀ ကောင်ထက်မနည်း သေပြီး အများအပြားဒဏ်ရာရသွားတယ်။ စစ်ကူလိုက်လာတဲ့ စစ်ကောင်စီကား ၄ စီးကို ဒုတိယအကြိမ် ထပ်မံတိုက်ခိုက်ခဲ့တယ်။ မိုင်းခွဲတိုက်ခိုက်အပြီး စစ်(...)တွေ ကားပေါ်က ဆင်းပြီး နေရာမယူခင်ကျနော်တို့ ဘက်က လက်နက်ကြီးနဲ့ ချက်ချင်းပစ်ခတ်တာဗျ။ သူတို့ ဘက်က ၂၀ ကျော်သေပြီးအများအပြား ဒဏ်ရာရှိသွားတယ်။” လို့ပြောပါတယ်။ 

တိုက်ပွဲအပြီးမှာ စစ်ကောင်စီဘက်က အလောင်း တလောင်းကို ချက်ချင်းလာ သယ်သွားတာတွေ့ရလို့ တပ်ရင်းမှူး အဆင့်ထက်မနိမ့်တဲ့ အရာရှိတစ်ယောက် တိုက်ပွဲ့အတွင်းမှာ သေဆုံးတယ်လို့ ခန့်မှန်းရပြီး ကျန်တဲ့အလောင်းတွေကိုတော့ ရေမျက်နီရွာမှာ သင်္ဂြိုဟ်ခဲ့ကြတယ်လို့ ဆိုပါတယ်။

အဲဒီစစ်ကောင်စီယာဥ်တန်းဟာ လက်ရှိ ညောင်လယ်ရွာမှာတပ်စွဲထားတယ်လို့လည်း YDF က  ပြောပါတယ်။

မနေ့က တိုက်ပွဲမှာ စစ်ကောင်စီဘက်က ၃၀ ကျော်သေဆုံးပြီး YDF ဘက်က အထိခိုက်အကျဆုံးမရှိခဲ့ဘူးလို့ ပြောဆိုထားပေမယ့် ဒီဗွီဘီက သီခြားအတည်မပြုနိုင်သေးသလို စစ်ကောင်စီဘက်ကလည်း သတင်းထုတ်ပြန်တာမတွေ့ရသေးပါဘူး။