close

အာရီဇိုးနားမီးသတ်အရာရှိ ကျောင်းနေကလေးများအတွက် ကျည်ကာအင်္ကျီ ထုတ်လုပ်

စာသင်ကျောင်းပစ်ခတ်မှုမှာ ကလေးတယောက်မှ အသက်ဆုံးရှုံးမှု မရှိရအောင် ကာကွယ်ပေးဖို့ သူ့ရဲ့ Escape Armour ကုမ္ပဏီက အသက်ကယ် သံချပ်ကာကို ထုတ်လုပ်ထားကြောင်း အာရီဇိုးနားပြည်နယ်က မီးသတ်အရာရှိ ကယ်ဗင်ဂွဒ်မန်းက ပြောလိုက်ပါတယ်။ 

ကလေး ၄ ယောက်ရဲ့ဖခင်ဖြစ်သူ ဂွဒ်မန်းဟာ ကျောင်းကျောပိုးအိတ်နဲ့ အလွယ်တကူ လိုက်လျောညီထွေ ရှိနိုင်မယ့် ကျည်ကာအင်္ကျီကို ဒီဇိုင်းထုတ်ခဲ့တာပါ။

ဒါကြောင့် ကလေးတွေဟာ သူတို့နဲ့အတူ တချိန်လုံး ယူဆောင်သွားနိုင်တယ်လို့ ဆိုပါတယ်။ သူ့ကျည်ကာမှာ ပိုကောင်းတဲ့ ပစ္စည်းတွေကို သုံးထားတယ်လို့ ပြောပါတယ်။

ဒီလိုကြောက်စရာကောင်းတဲ့ အခြေအနေမျိုးမှာ ကလေးတဦးကို အကာအကွယ်ပေးနိုင်မယ့် ပစ္စည်းတမျိုးမျိုး လုပ်ချင်ခဲ့တယ်လို့ ရိုက်တာကို ပြောခဲ့ပါတယ်။

အာရီဇိုးနားမှာ ၁၉၉၈ ခုနှစ်ကတည်းက မီးသတ်သမား၊ မီးသတ်ကပ္ပတိန်နဲ့ မီးသတ်စုံစမ်းစစ်ဆေးရေးမှူးအဖြစ်အပြင် အင်ဂျင်နီယာတဦးအဖြစ်လည်း လုပ်ကိုင်ခဲ့တဲ့ ဂွဒ်မန်းဟာ ရိုက်တာကို သူ့ကျည်ကာအင်္ကျီရဲ့စွမ်းဆောင်နိုင်မှုကို သရုပ်ပြခဲ့ပါတယ်။

ကလေးအရွယ်အစားအရုပ်မှာ ဝတ်ဆင်ပေးထားလိုက်ပြီး 9mm ရိုင်ဖယ်သေနတ်ရှည်၊ 9mm အော်တိုပစ္စတို သေနတ်နဲ့ ပွိုင့်ဖိုးဖိုက် ပစ္စတိုသေနတ်တွေနဲ့ အချက်ပေါင်းများစွာ ပစ်ခတ်ပြခဲ့ပါတယ်။ သူ့ပစ်ခတ်ပြမှုတိုင်းမှာ သူ့ကျည်ကာအင်္ကျီကို ကျည်ဆန် မဖောက်ဝင်နိုင်ပါဘူး။ 

သူ့ရဲ့ Escape Armor ကုမ္ပဏီမှာ အရွယ်အစားသုံးမျိုးရှိတဲ့ ခေါက်နိုင် ချိုးနိုင်တဲ့ အတွင်းဝတ်အင်္ကျီ နဲ့ ဘယ်ကျောပိုးအိတ်ကိုမဆို ကျည်ကာအဖြစ် သုံးလို့ရမယ့် သီးခြားဒိုင်းကာ ဆိုပြီး ထုတ်ကုန် ၂ မျိုး ထုတ်လုပ်ပါတယ်။ 

မေ ၂၄ ရက်က တက္ကဆက်ပြည်နယ် ယူဗာလ်ဒီမြို့မှာ ကျောင်းသား ၁၉ ဦးနဲ့ ဆရာ ၂ ဦး သေဆုံးခဲ့ရတဲ့ ဆယ်စုနှစ်အတွင်း အမေရိကန်ပြည်ထောင်စုရဲ့ အဆိုးရွားဆုံး စာသင်ကျောင်း အစုလိုက်အပြုံလိုက် ပစ်ခတ်မှု ဖြစ်ပွားခဲ့ရတာပါ။ 

အခုနှစ်အတွင်း အမေရိကန်မှာ အစုလိုက်အပြုံလိုက် ပစ်ခတ်မှု အနည်းဆုံး ၂၃၉ မှု ဖြစ်ပွားခဲ့ကြောင်း Gun Violence Archive သုတေသနအဖွဲ့အရ သိရပါတယ်။ 

//
Up