ဘင်္ဂလားဒေ့ရှ်အရှေ့မြောက်ပိုင်းမှာ မုတ်သုံမိုးသည်းထန်စွာ ရွာသွန်းမှုကြောင့် နေရာအနှံ့ ရေကြီးရေလျှံမှုတွေ ဖြစ်နေပြီး လူပေါင်း လေးသန်းကျော် သောင်တင်နေခဲ့ကြောင်း အာဏာပိုင်တွေက ဇွန်လ ၁၈ ရက်မှာ ပြောကြားလိုက်ပြီး အခြေအနေ ပိုဆိုးရွားလာနိုင်ကြောင်းလည်း သတိပေးထားပါတယ်။ 

စစ်တကောင်းမြို့မှာတော့ လမ်းတွေရေလျှံပြီး မြေပြိုမှုတွေလည်း ကြုံနေကြရပြီး မနက်အစောပိုင်းက အနည်းဆုံး လူ ၄ ဦး သေဆုံးခဲ့ကြောင်း သိရပါတယ်။ 

ရွှံ့နွံထဲမှာ ပိတ်မိနေတယ်လို့ ယူဆရသူတွေကို ရှာဖွေဖို့ ကယ်ဆယ်ရေးသမားတွေက ရွှံ့တွေထဲ တူးနေကြပါတယ်။

ဒီရေကြီးမှုဟာ ၂၀၀၄ ခုနှစ်နောက်ပိုင်း နိုင်ငံရဲ့အဆိုးရွားဆုံးဖြစ်နိုင်ချေရှိတယ်လို့ အစိုးရ ပညာရှင် တစ်ဦးက ဖော်ပြထားပါတယ်။ 

အိန္ဒိယတောင်တန်းတွေတစ်လျှောက် မိုးသည်းထန်စွာရွာသွန်းမှုကြောင့် ရေကြီးမှုက ပိုဆိုးရွားလာခဲ့ပါတယ်။ နောက်နှစ်ရက်အတွင်း မိုးပိုလာနိုင်တယ်လို့လည်း ခန့်မှန်းထားပါတယ်။