သြစတြေးလျနိုင်ငံသား ရှောင်တာနယ်အမှုကို နေပြည်တော်အချုပ်ထောင်အတွင်း သီးသန့်အထူးတရားရုံးမှာ ဒီနေ့ ဇွန် ၃၀ ရက်က ဆက်လက်ရုံးထုတ်စစ်ဆေးခဲ့တယ်လို့ တရားရုံးနဲ့နီးစပ်တဲ့ အသိုင်းအဝိုင်းကနေ သိရပါတယ်။

ရှောင်တာနယ်ကို စစ်ကောင်စီက လ.ဝ.က အက်ဥပဒေ၊ မြန်မာနိုင်ငံအစိုးရ လျှို့ဝှက်ချက်များ အက်ဥပဒေပုဒ်မ ၃-၁(ဂ) တို့နဲ့ စွဲဆိုထားတာဖြစ်ပြီး ပုဒ်မ ၃-၁(ဂ) ကို စွဲချက်တင်အမိန့်ချပြီး ဖြစ်တဲ့အတွက် စွပ်စွဲခံရသူတွေဘက်က တရားလိုအပါအဝင် လေးယောက်ကို ပြန်ခေါ်သက်သေ ခေါ်ထားတာ ဖြစ်ပါတယ်။

ဒီနေ့ရုံးချိန်းမှာ ပြန်ခေါ်သက်သေအဖြစ် ဒုတိယရဲမှူးကြီးတယောက်ကို စစ်ဆေးခဲ့တယ်လို့ တရားရုံးနဲ့နီးစပ်သူတယောက်က ပြောပါတယ်။

မြန်မာနိုင်ငံအစိုးရ လျှို့ဝှက်ချက်များ အက်ဥပဒေပုဒ်မ ၃-၁ (ဂ) အမှုမှာ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၊ ဦးစိုးဝင်း (စီမံ/ဘဏ္ဍာဝန်ကြီး)၊ ဦးဆက်အောင် (စီမံ/ဘဏ္ဍာ/စက်မှုဒုဝန်ကြီး)၊ ဦးကျော်ဝင်း (စီမံ/ဘဏ္ဍာဝန်ကြီးဟောင်း) တို့ကို အမှုတွဲအဖြစ် တရားစွဲဆိုထားပြီး အဆိုပါပုဂ္ဂိုလ်လေးယောက်ကို အားပေးကူညီမှုနဲ့ စွဲချက်တင်အမိန့်ချပြီး ဖြစ်ပါတယ်။

အာဏာသိမ်းစစ်ကောင်စီအနေနဲ့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ကို ဇွန် ၂၂ ရက်က နေပြည်တော်အချုပ်ထောင်ဝန်းအတွင်းရှိ သီးသန့်အဆောက်အဦတခုမှာ ပြောင်းရွှေ့လိုက်ပြီး အမှုတွေကိုလည်း အချုပ်ထောင်အတွင်းက သီးသန့်အထူးတရားရုံးမှာပဲ ဇွန် ၂၃ ရက်ကတည်းက စတင်ရုံးထုတ် စစ်ဆေးနေတာပါ။

အခုလို နေပြည်တော်အချုပ်ထောင်အတွင်းကို ပြောင်းရွှေ့လိုက်ပြီးနောက်ပိုင်း စစ်ကောင်စီ လက်အောက်ခံ တရားသူကြီးတွေ၊ ဥပဒေအရာရှိတွေရဲ့ ကားတွေကို အချုပ်ထောင်အတွင်း ဝင်ခွင့်ပြုပေမဲ့ စွပ်စွဲခံရသူတွေရဲ့ ရှေ့နေတွေ ကားတွေကိုတော့ အချုပ်ထောင်ဝန်းအပြင်က လုံခြုံရေးဂိတ်တွေနားမှာပဲ ထားခဲ့ရတယ်လို့ တရားရုံးနဲ့ နီးစပ်သူတွေ၊ မျက်မြင်တွေ့သူတွေက ပြောပါတယ်။

အခုလို ခွဲခြားထားတဲ့အတွက် စွပ်စွဲခံရသူတွေရဲ့ ရှေ့နေတွေဟာ သူတို့ရဲ့ လိုအပ်တဲ့ အစားအသောက်နဲ့ ပစ္စည်းအထုပ်အပိုးတွေ၊ အမှုသည်တွေကိုပေးဖို့ လိုအပ်တဲ့ အစားအသောက်နဲ့ ပစ္စည်းအထုပ်အပိုးတွေကို အဝေးကြီး လမ်းလျှောက် သယ်ယူသွားနေရတယ်လို့ တရားရုံးနဲ့ နီးစပ်သူတွေနဲ့ မျက်မြင်တွေ့သူတွေက ဆိုပါတယ်။