ထိုင်းနိုင်ငံမှာ ဆေးခြောက်ကို တကိုယ်ရေသုံးဖို့ တရားဝင် ခွင့်ပြုလိုက်တဲ့အပေါ်  ကင်ဆာ ရောဂါရှင်က ကြိုဆိုလိုက်ပါတယ်။

အဆင့်လေး ရင်သားကင်ဆာကို တိုက်ပွဲဝင်နေရတဲ့ ဂျိရတ်တီကွတ်တာနမ်အတွက် ဗီရိုထဲမှာ ဆေးခြောက်ရွက်တွေ ထည့်ထားတဲ့ ဖန်ပုလင်းတွေကို မြင်ရတာ ဝေဒနာသက်သာစေတဲ့ မြင်ကွင်းပါ။

ဆေးခြောက်ကို မူးယစ်ဆေးအဖြစ် စာရင်းသွင်းထားတာကို ပယ်ဖျက်တဲ့ ထိုင်းအစိုးရရဲ့ ဆုံးဖြတ်ချက်ကို လှိုက်လှိုက်လှဲလှဲ ကြိုဆိုတဲ့ ထိုင်းနိုင်ငံသားတွေထဲမှာ သူလည်းပါဝင်းပါတယ်။ 

ဇန်နဝါရီလက စပြီး ကီမိုဆေးသွင်းနေရတဲ့ ဘီးလို့ အိမ်နာမည်နဲ့ ခေါ်တဲ့ ထိုင်းအမျိုးသမီးဟာ နာကျင်မှုနဲ့ သောကအတွက် ကျန်ခဲ့တဲ့ ၃ နှစ်လုံး ဆေးခြောက်ဆီကို သုံးနေခဲ့ရတာပါ။

ဆေးခြောက်ဆီဟာ ပင်ပန်းနွမ်းနယ်တာ၊ အိပ်မပျော်တာ၊ အန်တာနဲ့ ခံတွင်းပျက်တာတွေကို ကုသရာမှာ ထိရောက်ပြီး ဘေးထွက်ဆိုးကျိုးကလည်း စီးပွားဖြစ် ဆေးတွေထက် ပိုပျော့ပါတယ်။

မောတာနဲ့ နာကျင်တာ သက်သာစေဖို့ ဆေးခြောက်သုံးတဲ့ ဓလေ့ရှိတဲ့ ထိုင်းနိုင်ငံမှာ ၂၀၁၈ ခုနှစ်က စပြီး ဆေးခြောက်ကို ဆေးဝါးအဖြစ် သုံးဖို့ ခွင့်ပြုထားပါတယ်။ အခုတော့ ထိုင်းဟာ ဆေးခြောက်ကို တကိုယ်ရေ စားသုံးခွင့်နဲ့ စိုက်ပျိုးခွင့်ပြုတဲ့ ပထမဆုံး အာရှနိုင်ငံ ဖြစ်လာပါပြီ။

“ဥပဒေ မပြင်ခင်က နည်းနည်းပိုစိတ်ချရတဲ့ ပြည်ပကနေ တင်သွင်းလာတဲ့ ဆေးခြောက်တစ်ဂရမ်ကို ဘတ် ၇၀၀ လောက် ကုန်ကျနိုင်တယ်။ ခုတော့ တစ်ဂရမ်ကို ဘတ် ၃၅၀ ဝန်းကျင်ပဲ ရှိတော့တယ်” လို့  ဘီးက ပြောပါတယ်။

ဆေးခြောက်ကို တရားဝင်သုံးနည်းနဲ့ ပတ်သက်ပြီး ရှုပ်ထွေးနေသေးလို ဆေးခြောက် ဥပဒေမူကြမ်းအတွက် ထိုင်းလွှတ်တော်အမတ်တွေ စကားရည်လု ငြင်းခုန်နေဆဲဖြစ်ပြီး ဥပဒေမူကြမ်းကနေ ဥပဒေဖြစ်ဖို့ လချီ အချိန်ယူရဦးမှာ ဖြစ်ပါတယ်။

“ရှင် ပညာရေးကို လိုအပ်တယ်။ ဆေးခြောက်ကို မှန်တဲ့နည်းနဲ့ ဘယ်လိုသုံးမလဲဆိုတာ လေ့လာဖို့ လိုတယ်။ မဟုတ်ရင် ဆေးခြောက်ဟာ အန္တရာယ်ရှိနိုင်တယ်” လို့ အဆင့်လေး ရင်သားကင်ဆာ ဝေဒနာသည်  ဂျိရတ်တီ ကွတ်တာနမ်က ပြောပါတယ်။

ဆေးခြောက်ကို စားစရာ သောက်စရာတွေထဲမှာ ထည့်စားဖို့ ခွင့်ပြုထားပေမဲ့ အများပြည်သူနဲ့ သက်ဆိုင်တဲ့ နေရာတွေမှာ ဆေးခြောက်ရှူတာကတော့ ကျန်းမာရေးဆိုင်ရာ ဥပဒေတွေကို ချိုးဖောက်ရာ ရောက်နေဆဲပါ။

ကျောင်းတွေမှာလည်း ဆေးခြောက်သုံးတာကို တားမြစ်ပိတ်ပင် ထားပါတယ်။ ဒါ့အပြင် စားစရာ သောက်စရာ တွေထဲမှာ ဆေးခြောက်သုံးတဲ့ ပမာဏနဲ့ ပတ်သက်တဲ့ ရှင်းလင်းတဲ့ သတင်းအချက်အလက် ပေးဖို့ လိုအပ်နေပါတယ်။

ဆေးခြောက်ကို စားစရာ သောက်စရာ အနေနဲ့ စားသုံးစိုက်ပျိုးဖို့ တရားဝင်ခွင့်ပြုရင် စီးပွားရေး ကဏ္ဍတွေထဲက စိုက်ပျိုးရေးနဲ့ ဆေးဝါး သုတေသနကို ကူညီရာရောက်မယ်လို့ မျှော်လင့်တဲ့အကြောင်း ထိုင်းအစိုးရက အရင်က ပြောခဲ့ဖူးပါတယ်။