မကွေးတိုင်း ဆောမြို့နယ် လောင်းရှည်ဒေသအတွင်းမှာ ဆိပ်ဖြူမြို့နယ်ဘက်က စစ်ဘေးရှောင်လာတဲ့ ပြည်သူ ၄၀၀ ကျော်အတွက် အရေးပေါ်အကူညီတွေ လိုအပ်နေတယ်လို့ လောင်းရှည်-PDF(YRPA) က ပြောပါတယ်။

ဆိပ်ဖြူမြို့နယ်နဲ့ ယောနယ်အစပ်က ပိုင်းကျေးရွာ၊ ရှားလှရွာ၊ ဝန်ကြီးရွာတွေဘက်ကို ဇူလိုင် ၇ ရက်နေ့ကစတင်ကာ ချောက်အခြေစိုက် ခလရ (၁၃) က စစ်ကောင်စီတပ်သား အင်အား ၁၀၀ ကျော်လောက်နဲ့ စစ်ကြောင်းထိုးလာလို့ ဒေသကာကွယ်ရေးတပ်ဖွဲ့တွေနဲ့ တိုက်ပွဲတွေ ဖြစ်ပွားခဲ့ကြတယ်လို့ လောင်းရှည်-PDF ရဲ့ ပြန်ကြားရေး တာဝန်ခံ ဗိုလ်မာဂ က ဒီဗွီဘီကို ပြောပါတယ်။

“အဲဒီစစ်ကြောင်းထိုးခံရတဲ့ ရွာတွေနဲ့ နီးတဲ့ အိုင်းကြီး၊ စိုက်ခင်းနဲ့ ဖလံမ ကျေးရွာက ပြည်သူတွေဟာ စစ်ကြောင်းထိုးမှာ လက်နက်ကြီးကျမှာတွေကို ကြောက်ပြီး ယောနယ်ထဲက ကျနော်တို့ လောင်းရှည်ဒေသ LSR-PDF ရဲ့ ထိန်းချုပ်နယ်မြေထဲကို ဒေသခံပြည်သူ ၄၀၀ ကျော်လောက် ထွက်ပြေးခိုလှုံလာကြတယ်။ အစပိုင်းမှာတော့ စစ်ဘေးရှောင်ပြည်သူဦးရေဟာ လေးငါး ဆယ်လောက်ပဲ ရှိရာကနေ တဖြည်းဖြည်းနဲ့ တိုးလာတာ ၄၀၀ ကျော်လောက်အထိ ရှိလာပြီး နောက်ထပ်လည်း ထပ်မံရောက်ရှိမှာဖြစ်လို့ အကူညီတွေလိုအပ်နေတယ်။” 

လတ်တလောမှာတော့ LSR-PDF က စစ်ရှောင်တွေအတွက် သောက်သုံးရေ၊ စားနပ်ရိက္ခာ၊ မိုးကာတဲတွေနဲ့ လုံခြုံတဲ့ အဆောက်ဦတွေမှာ နေရာထိုင်ခင်းတွေ စီစဥ်ပေးပြီး နေရာချထားတယ်လို့ ဆိုပါတယ်။

စစ်ဘေးရှောင်ပြည်သူတွေအတွက် မိုးတွင်းကာလဖြစ်လို့ ခြင်ထောင်၊ စောင်၊ အဝတ်အထည်၊ ဆေးဝါး၊ အမိုးအကာနဲ့ စားနပ်ရိက္ခာတွေ အရေးပေါ်အကူညီလိုအပ်နေလို့ ပြည်တွင်းပြည်ပ အလှူရှင်တွေအနေနဲ့ LSR-PDF ကနေတဆင့် ဆက်သွယ်လှူဒါန်းပေးကြဖို့ မေတ္တာရပ်ခံတောင်းဆိုထားပါတယ်။

ဆိပ်ဖြူမြို့နယ်အတွင်းကို စစ်ကောင်စီတပ်တွေ စစ်ကြောင်းထိုးလာလို့ ဇူလိုင် ၇ ရက်နေ့ကနေ ၁၀ ရက်နေ့အထိ ဒေသကာကွယ်ရေးပူးပေါင်းတပ်ဖွဲ့တွေက ခုခံတိုက်ခိုက်ခဲ့ကြလို့ စစ်ကောင်စီဘက်က ၁၆ ယောက်ထက်မနည်း သေဆုံးပြီး အများအပြား ဒဏ်ရာရရှိခဲ့တယ်လို့ သိရပါတယ်။