အမြန်ကူးစက်ပြန့်ပွားနေတဲ့ မျောက်ကျောက်ရောဂါဟာ ကမ္ဘာ့ကျန်းမာရေးအဖွဲ့ WHO ရဲ့ အမြင့်ဆုံး သတိပေးချက်ဖြစ်တဲ့ ကမ္ဘာလုံးဆိုင်ရာ ကျန်းမာရေး အရေးပေါ်အခြေအနေ တစ်ရပ် ဖြစ်လာနေပြီလို့ WHO ရဲ့ ညွှန်ကြားရေးမှူးချုပ် တေဒရို့စ် အဒ်ဒါနွန် ဂေဘရီယေးဆပ်က ဇူလိုင် ၂၃ ရက်မှာ ပြောလိုက်ပါတယ်။

WHOက လက်ရှိအခြေအနေကို - "အပြည်ပြည်ဆိုင်ရာမှာ စိုးရိမ်စရာဖြစ်တဲ့ ပြည်သူ့ကျန်းမာရေး အရေးပေါ်အခြေအနေ"အဖြစ် သတ်မှတ်လိုက်တာဟာ နိုင်ငံတကာက ညှိနှိုင်းတုံ့ပြန်ဖို့ လိုအပ် ကြောင်း သတိပေးဖို့ ဒီဇိုင်းထုတ်ထား တာပါ။

ရန်ပုံငွေနဲ့ ကာကွယ်ဆေးတွေ မျှဝေကုသဖို့ ကမ္ဘာလုံးဆိုင်ရာ ပူးပေါင်းဆောင်ရွက်မှုတွေကို  လမ်းဖွင့် ပေးလိုက်နိုင်တာလည်း ဖြစ်ပါတယ်။

ဇူလိုင် ၂၁ ရက်မှာ တွေ့ဆုံခဲ့တဲ့ ကျွမ်းကျင်သူ ကော်မတီဝင်တွေဟာ ဆုံးဖြတ်ချက်အပေါ် သဘောထားကွဲသွားတယ်လို့ အမည်မဖော်လိုသူ သတင်းရင်းမြစ်နှစ်ခုက အစောပိုင်းတွင် ရိုက်တာသတင်းဌာနကို ပြောခဲ့ပေမဲ့ နောက်ဆုံး ဆုံးဖြတ်ချက်ကတော့ ကုလသမဂ္ဂ အေဂျင်စီရဲ့ ညွှန်ကြားရေးမှူးချုပ်ဆီ ကျရောက်ခဲ့ပါတယ်။

ကျန်းမာရေးအရေးပေါ်အခြေအနေအတွက် ဆုံးဖြတ်ချက်ကို ကြေညာရာမှာ ကော်မတီဟာ သဘောတူညီချက်တစ်ရပ်ကို မရယူနိုင်ခဲ့ဘဲ ကြေညာချက်ကို အဖွဲ့ဝင် ကိုးဦးက ထောက်ခံမဲခြောက်မဲနဲ့ ထောက်ခံခဲ့တယ်လို့ တေဒရို့စ်က ဂျီနီဗာမြို့မှာ ကျင်းပတဲ့ သတင်းစာ ရှင်းလင်းပွဲအတွင်း အတည်ပြုပြောကြားပါတယ်။

အခုနှစ်အထိ နိုင်ငံပေါင်း ၇၅ နိုင်ငံကျော်မှာ လူအယောက် ၁၆,၀၀၀ မျောက်ကျောက် ရောဂါဖြစ်ပွားခဲ့ပြီး အာဖရိကမှာ ရောဂါကြောင့် လူ ငါးဦးသေဆုံးခဲ့ပါတယ်။

မျောက်ကျောက်ရောဂါဟာ ဗိုင်းရပ်စ်ကတဆင့် ကူးစက်တဲ့ ရောဂါဖြစ်ပြီး အနီးကပ်ထိတွေ့ရာက ကူးစက်တာပါ။ တုပ်ကွေးနဲ့ ဆင်တူတဲ့ လက္ခဏာတွေနဲ့ အရေပြားအဖုတွေ ပြည့်နေတဲ့ အရေပြားဒဏ်ရာများကို ဖြစ်ပေါ်စေပါတယ်။

ဒီ ဗိုင်းရပ်စ်ရောဂါဟာ အာဖရိကအပြင်ဘက်မှာ ကူးစက်ရာမှာ လတ်တလော ကူးစက်မှုတွေ အတွင်း အမျိုးသားချင်း လိင်ဆက်ဆံတဲ့ အမျိုးသားတွေကြားမှာ အဓိက ပျံ့နှံ့ခဲ့တယ်လို့ ရိုက်တာ သတင်းဌာနက ဖော်ပြပါတယ်။