အမေရိကန်အောက်လွှတ်တော်ဥက္ကဋ္ဌ ထိုင်ဝမ်ကျွန်းလာရောက်ပါက အရေးယူမည်ဟု တရုတ် သတိပေး
တကယ်လို့ အမေရိကန် အောက်လွှတ်တော်ဥက္ကဋ္ဌ နန်စီပေလိုစီ ထိုင်ဝမ်ကျွန်းကို လာရောက်လည်ပတ်ခဲ့မယ်ဆိုရင် တရုတ်စစ်တပ်က ဘာမှမလုပ်ဘဲ ထိုင်နေမှာ မဟုတ်ဘူးလို့ တရုတ်ပြည်မကြီး အစိုးရက ဩဂုတ် ၁ ရက်မှာ ပြောလိုက်ပါတယ်။
တရုတ်နိုင်ငံခြားရေးဝန်ကြီးဌာနရဲ့ ပုံမှန်သတင်းစာရှင်းလင်းပွဲမှာ ဝန်ကြီးဌာန ပြောခွင့်ရ ကျောက်လိကျန်းက နောက်ဆုံး သတိပေး ပြောဆိုခဲ့တာပါ။
ပေလိုစီရဲ့ အဆင့်အတန်းဟာ အမေရိကန်အစိုးရရဲ့ တတိယအဆင့်မြင့်ဆုံး အရာရှိဖြစ်နေပြီး တရုတ်ပိုင်ဆိုင်တဲ့နေရာလို့ အခိုင်အမာ ကြေညာထားတဲ့ ထိုင်ဝမ်ကျွန်းကို လာလည်တာဟာ တရုတ်ပြည်တွင်းရေးကို ပြောင်ပြောင်တင်းတင်း ချိုးဖောက်တာလို့ ကျောက်လိကျန်းက ပြောပါတယ်။
ဒီခရီးစဉ်ဟာ အင်မတန်လေးနက်တဲ့ ဖြစ်ထွန်းမှုနဲ့ သက်ရောက်မှုတွေဆီ ဦးတည်သွားလိမ့်မယ်လို့လည်း သူက ပြောပါတယ်။
ပေလိုစီဟာ စင်ကာပူ၊ မလေးရှား၊ တောင်ကိုရီးယားနဲ့ ဂျပန်တို့ အပါအဝင် အာရှ လေးနိုင်ငံခရီးစဉ်ကို ဩဂုတ် ၁ ရက်မှာ စတင်ခဲ့ပြီး စင်ကာပူကို ရောက်နေပါပြီ။
သူဟာ ဒီမိုကရေစီနည်းကျ အုပ်ချုပ်နေတဲ့ ထိုင်ဝမ်ကို သွားရောက်လည်ပတ်ရင်း တရုတ်ပြည်မကြီး အစိုးရရဲ့ ဒေါသကို ဆွမယ်လို့ အပြင်းအထန် ထင်ကြေးပေးနေကြပါတယ်။
တရုတ်ဘက်က အချုပ်အခြာအာဏာနဲ့ ပိုင်နက်နယ်မြေ ဂုဏ်သိက္ခာကို ကာကွယ်ဖို့ သေချာပေါက် ပြတ်ပြတ်သားသားနဲ့ ပြင်းထန်တဲ့ တန်ပြန်အရေးယူမှုတွေ လုပ်သွားမှာပါ။
“သူသွားရဲတယ်ဆိုရင် တရုတ်က ဘယ်လိုအရေးယူ ဆောင်ရွက်မလဲ စောင့်ကြည့်ကြရအောင်” လို့ ကျောက်လိကျန်းက ပြောခဲ့ပါတယ်။
ပေလိုစီဟာ စင်ကာပူ၊ မလေးရှားနိုင်ငံတွေဆီ သွားရောက်လည်ပတ်ပြီးရင် ထိုင်ဝမ်ကို ဆက်သွားမယ်လို့ အမေရိကန်နဲ့ ထိုင်ဝမ်အကြီးတန်းအရာရှိတွေက CNN သတင်းဌာနကို ဩဂုတ် ၁ ရက် နှောင်းပိုင်းမှာ အတည်ပြု ပြောဆိုခဲ့ပါတယ်။
