ရီးရဲလ်မက်ဒရစ်အသင်းဆီကို တချိန်မှာပြန်လာဖို့မျှော်လင့်ကြောင်း ပရိသတ်တွေဆီကို နှုတ်ဆက်စာ မှာ ကွင်းလယ်လူ ကတ်စမဲရိုးက ရေးသားထားပါတယ်။

အသက် ၃၀ အရွယ် ဘရာဇီးကွင်းလယ်လူဟာ မန်ယူအသင်းဆီကို ပေါင်သန်း ၇၀ နဲ့ ပြောင်းရွှေ့လာခဲ့ပြီး ၄ နှစ်စာချုပ်ချုပ်ဆိုသွားမှာပါ။

မန်ယူအသင်းဘက်က အတည်ပြုပြီးချိန်မှာတော့ ကတ်စမဲရိုးက ရီးရဲလ်ပရိသတ်တွေကို နှုတ်ဆက်စာရေးသားခဲ့ပါတယ်။

သူ့ရဲ့နှုတ်ဆက်စာထဲမှာ သူ့ရဲ့အိမ်လိုအမြဲတမ်းလွမ်းဆွတ်နေမယ့် မက်ဒရစ်အသင်းဆီကို တချိန်မှာပြန်လာဖို့ မျှော်လင့်ကြောင်း၊ ဘဝရဲ့အခမ်းနားဆုံးဖြစ်ရပ်တွေကို မက်ဒရစ်အသင်းနဲ့ အတူဖြတ်သန်းခဲ့ကြောင်း၊ မက်ဒရစ်ရဲ့ကျေးဇူးက ဘဝထောင်ချီဆပ်မယ်ဆိုရင်တောင် မကျေနိုင် ကြောင်း ကတ်စမဲရိုးက ရေးသားခဲ့ပါတယ်။

သူဟာ ၂၀၁၃ ခုနှစ်ကတည်းက ဆာအိုပေါ်လိုအသင်းကနေ ပြောင်းရွှေ့လာပြီး ရီးရဲလ်အတွက် စုစုပေါင်း ၃၃၆ ပွဲကစားပေးခဲ့ပါတယ်။