တနင်္သာရီတိုင်း၊ ထားဝယ်မြို့နယ် အရှေ့တောဒေသ သင်္ကန်းတုံးရွာနဲ့ ကျောက်မဲတောင်ရွာ အကြားမှာ တနေကုန် တိုက်ပွဲတွေ ဆက်တိုက်ဖြစ်ပွားနေပြီး စစ်ကောင်စီဘက်က အယောက် ၂၀ နီးပါး ထိခိုက်သေဆုံးနိုင်တယ်လို့ သိရပါတယ်။

ဒီနေ့ စက်တင်ဘာ ၂ ရက် မနက်ပိုင်းမှာ လိပ်ကြယ်ပြောင်ဘက်က အင်အား ၁၀၀ ကျော်နဲ့ ကျောက်မဲတောင်ဘက်က ၈၀ ကျော် နှစ်ဖက်ညှပ်တက်လာတဲ့ စစ်ကောင်စီတပ်ဖွဲ့ဝင်တွေကို ကော်သူးလေအာမီနဲ့ ပြည်သူ့ကာကွယ်ရေး ပူးပေါင်းအဖွဲ့တွေက လမ်းကြောင်းတလျှောက် တိုက်ခိုက်ခဲ့တာလို့ မြေပြင်မှာရှိနေတဲ့ ပြည်သူ့ကာကွယ်ရေးတပ်ဖွဲ့ဝင် ရဲဘော်တယောက်က ပြောပါတယ်။

“ဒီနေ့တော့ တိုက်ပွဲ အတော်ပြင်းထန်တယ်၊ အခုထိမပြီးသေးဘူး။ လက်နက်ကြီးထုတာ အလုံး ၁၀၀ လောက်ထုတာ။ တနေကုန် လက်နက်ကြီးသံမစဲဘူး။ သေနတ်သံ လက်နက်ငယ်သံ မစဲဘူး။”

စစ်ကောက်စီက လက်နက်ကြီးနဲ့ အဆက်မပြတ် ရမ်းသန်းပစ်ခတ်ခဲ့လို့ ဝကုန်းရွာနေအိမ်တွေ ထိခိုက်ပျက်စီးမှုရှိတယ်လို့ သိရပါတယ်။

လက်ရှိအချိန်အထိ စစ်ကောင်စီက ဝကုန်းရွာမှာ စခန်းချထားပြီး လက်နက်ကြီးနဲ့ ရမ်းသန်းပစ်ခတ်နေဆဲဖြစ်တယ်လို့ သိရပါတယ်။

စက်တင်ဘာ ၁ ရက် မနက် ၁၀ နာရီခွဲမှာ ပကာရီကျေးရွာအုပ်စု သရက်ငုတ်ရွာအနီးမှာ စစ်ကောင်စီတပ်ဖွဲ့နဲ့ ပြည်သူ့ကာကွယ်ရေးတပ်ဖွဲ့တွေ မိနစ် ၃၀ လောက် တိုက်ပွဲဖြစ်ခဲ့ပြီး စစ်ကောင်စီဘက်က ၇ ယောက်ထက်မနည်း သေဆုံးကာ ထိခိုက်ဒဏ်ရာရသူတွေလည်း ရှိတယ်လို့ သိရပါတယ်။

ဩဂုတ် ၂၆ ရက်ကလည်း မေတ္တာရွာအလွန် အိုင်ဝိုင်းရွာအနီး ထားဝယ်-ထီးခီးလမ်းပေါ်မှာ ထားဝယ်မြို့က ထီးခီးဘက်ကို ထွက်ခွာလာတဲ့ စစ်ကောင်စီယာဉ်တန်းကို ကော်သူးလေအာမီနဲ့ ပြည်သူ့ကာကွယ်ရေး ပူးပေါင်းအဖွဲ့က တိုက်ခိုက်ခဲ့လို့ စစ်ကောင်စီဘက်က အထိနာတယ်လို့ သိရပေမယ့် တိုက်ပွဲဖြစ်စဉ် အသေးစိတ်ကိုတော့ မသိရသေးပါဘူး။