ဟာရီကိန်း Ian ကြောင့် လူပေါင်း ၁၁ သန်းလောက်ရှိတဲ့ ကျူးဘားကျွန်းမှာ လျှပ်စစ်မီး ပြတ်တောက်သွားပြီး နောက် ၃ ရက်အကြာ စက်တင်ဘာ ၃၀ ရက်က လျှပ်စစ်မီး ပြတ်တောက်နေဆဲ ဟာဗားနားရှိ ရပ်ကွက်တွေမှာ ကျူးဘားလူမျိုးတွေဟာ အိုးတွေကို ထုရိုက်ပြီး အော်ဟစ် ဆန္ဒပြခဲ့ကြပါတယ်။ 

စက်တင်ဘာ  ၂၉ ရက် ညနေပိုင်းနဲ့ စက်တင်ဘာ ၃၀ ရက် မနက်တို့မှာ မြို့ရဲ့ တခြားနေရာ အတော်များများက လမ်းတွေပေါ်မှာ  လက်တင်အမေရိကမှာ မကျေနပ်မှုတွေကို ဖော်ပြတဲ့ ရိုးရာနည်းလမ်းအတိုင်း အိုးခွက်တီးပြီး အုပ်စုငယ်လေးတွေ ငြိမ်းချမ်းစွာ ဆန္ဒပြခဲ့ကြကြောင်း ရိုက်တာက ပြောပါတယ်။ 

အမေရိကန်ပြည်ထောင်စု အရှေ့တောင်ဘက် ကမ်းရိုးတန်းတလျှောက် မြောက်ဘက်ကို ဝင်တိုက်ခဲ့တဲ့ ဟာရီကိန်း Ian ဟာ စက်တင်ဘာ ၂၇ ရက်က ကျူးဘားကို ဝင်မွှေခဲ့တာကြောင့် နေအိမ်တွေ ပြိုပျက်ကျပြီး စိုက်ခင်းတွေလည်း ပျက်စီးကုန်ပါတယ်။ 

အစိုးရဟာ အဲဒီအချိန်ကတည်းက ပြုပြင်မှုများကို လုပ်ဆောင်ခဲ့ပြီး စက်တင်ဘာ ၃၀ ရက် မွန်းလွဲ ပိုင်းမှာတော့ မြို့တော်တဝက်မှာ လျှပ်စစ်မီးကို ပြန်သုံးနိုင်ခဲ့ပါတယ်။ 

“တာဝန်ရှိတဲ့သူတွေက သူတို့အလုပ် သူတို့မလုပ်တဲ့အခါမှသာ ဆန္ဒပြတာဟာ အခွင့်အရေးတစ်ခုလို့ ယုံကြည်ထားပေမယ့် မနေ့က ဆန္ဒပြပွဲတွေက ကူညီမယ့်အစား ငါတို့ရဲ့တာဝန်ကို နှောင့်နှေးစေတယ်”လို့ ဟာဗားနားရှိ နိုင်ငံရဲ့ အာဏာရ ကွန်မြူနစ်ပါတီ ခေါင်းဆောင် လူးဝစ္စ အန်တိုနီယို တောရက်စ်က အစိုးရပိုင် TV ကို  ပြောကြားခဲ့ပါတယ်။

စက်တင်ဘာ ၃၀ ရက် နေ့လယ်ပိုင်းအထိ ဟာဗားနားမှာ ဆန္ဒပြပွဲတွေ ခပ်ကျဲကျဲ ရှိခဲ့ပြီး လျှပ်စစ်မီး ပြန်မရသေးတဲ့ ဒေသတွေမှာ‌တော့ ကန့်သတ်ထားပါတယ်။ 

ဆိုရှယ်မီဒီယာပေါ်က အစီရင်ခံစာတွေမှာ စက်တက်ဘာ ၃၀ ရက်က ဟာဗားနားနဲ့ နိုင်ငံတွင်း တခြားနေရာတွေမှာ ဆန္ဒပြပွဲငယ်တွေကို ပြသခဲ့ပါတယ်။