အယ်ဂျီယန်ပင်လယ်အလယ်ပိုင်းရှိ လက်စ်ဘော့စ်ဂရိကျွန်းစုနဲ့ ခစ်သီရာကျွန်းအနီးရေပြင်တို့မှာ သင်္ဘော ၂ စီး နစ်မြုပ်ခဲ့ရာမှာ ပြီးခဲ့တဲ့ ၂၄ နာရီ အတွင်း လူအယောက် ၃၀ လောက် ပျောက်ဆုံးနေဆဲလို့ ကမ်းခြေစောင့်တပ်ဖွဲ့မှ တာဝန်ရှိသူတွေက ပြောပါတယ်။

အောက်တိုဘာ ၆ ရက် အစောပိုင်းက လက်စ်ဘော့စ်ကျွန်းနားမှာ နစ်သွားတဲ့ သင်္ဘောကနေ လူပေါင်း ၁၇ ဦးထက်မနည်း သေဆုံးခဲ့ပြီး အမျိုးသမီးတွေ အများစုဖြစ်တယ်လို့ ဆိုပါတယ်။

လက်စ်ဘော့စ်ကနေ ထွက်လာတဲ့ သင်္ဘောဟာ လှိုင်းကြီးလေထန်ပြီး နစ်မြုပ်သွားချိန်မှာ လူ ၄၀ လောက်ကို တင်ဆောင်လာတယ်လို့  ရွှေ့ပြောင်းနေထိုင်သူတွေရဲ့ စာရင်းတွေကို အခြေခံပြီး  ကမ်းခြေစောင့်တပ်ဖွဲ့ တာဝန်ရှိသူတွေက ခန့်မှန်းထားပါတယ်။

အမျိုးသမီး ၁၀ ယောက်ကို ကယ်ဆယ်နိုင်ခဲ့ပါတယ်။ အမျိုးသမီး ၁၆ ယောက်နဲ့ ယောက်ျားလေး ၁ တယောက်ရဲ့ ရုပ်အလောင်းတွေကို ပြန်လည်တွေ့ရှိခဲ့ပါတယ်။ နောက်ထပ် ၁၃ ယောက် ပျောက်ဆုံးနေတယ်လို့ ယူဆရပါတယ်။

ဂရိနိုင်ငံတောင်ပိုင်း ခစ်သီရာ ကျွန်းအနီးက ရေပြင်မှာ ဗုဒ္ဓဟူးနေ့နှောင်းပိုင်းက မုန်တိုင်းထန်တဲ့ရေပြင်မှာ နစ်မြုပ်ခဲ့တဲ့ နောက်ထပ်လှေတစ်စီးက ကလေးငယ် ၁၈ ဦး အပါအဝင် အနည်းဆုံး လူ ၈၀ ကို အာဏာပိုင်တွေက ကယ်ဆယ်နိုင်ခဲ့ပါတယ်။

နောက်ထပ် ၁၅ ယောက်ပျောက်ဆုံးနေတယ်လို့ ယူဆရပါတယ်။ သူတို့တွေကို စာသင်ကျောင်းမှာ ခေတ္တ နေရာချထားပါတယ်။ ပျောက်ဆုံးနေတဲ့ သင်္ဘောနှစ်စင်းစလုံးမှာ ရှာဖွေကယ်ဆယ်ရေး လုပ်ငန်းတွေကို လုပ်ဆောင်နေဆဲ ရှိပါတယ်။