ပြီးခဲ့တဲ့လက နော့ဒ်စထရင်းမ်တူး ဓာတ်ငွေ့ပိုက်လိုင်းကို ဗြိတိန်ရေတပ်သားတွေက ဖောက်ခွဲခဲ့ တာဖြစ်ပြီး အဲဒီထဲမှာ မြောက်အတ္တလန္တိတ်စစ်ရေးမဟာမိတ် အဖွဲ့ (NATO) ရဲ့ ထိပ်တန်း အဖွဲ့ဝင် တဦးက အရေးပါတဲ့ ရုရှားအခြေခံအဆောက်အအုံတွေကို ဖျက်ဆီးခဲ့တယ်လို့ ရုရှားကာကွယ်ရေးဝန်ကြီးဌာနက အောက်တိုဘာ ၂၉ ရက်မှာ တိုက်ရိုက်စွပ်စွဲခဲ့ပါတယ်။ 

ရုရှားကာကွယ်ရေးဝန်ကြီးဌာနက သူ့အဆိုအတွက် အထောက်အထား မပြခဲ့ပါဘူး။

“ရနိုင်တဲ့ အချက်အလက်တွေအရ ဗြိတိန်ရေတပ်ရဲ့ ကိုယ်စားလှယ်တွေဟာ ဒီနှစ် စက်တင်ဘာ ၂၆ ရက်က ဘောလ်တစ်ပင်လယ်မှာ အကြမ်းဖက်တိုက်ခိုက်မှု စီမံချက်ရေးဆွဲရာမှာ ပါဝင်ဆောင်ရွက်ခဲ့ကြတဲ့ နော့ဒ်စထရင်းမ် ဝမ်းနဲ့ တူး ဓာတ်ငွေ့ပိုက်လိုင်းတွေကို ဖောက်ခွဲခဲ့ပါတယ်" လို့ ဝန်ကြီးဌာနက ပြောပါတယ်။

ဗြိတိန်ကာကွယ်ရေးဝန်ကြီးဌာနကတော့ ချက်ချင်းမှတ်ချက်ပေးဖို့ ငြင်းဆိုခဲ့ပါတယ်။

ဘောလ်တစ်ပင်လယ် ကြမ်းပြင်ပေါ်မှာ ရုရှားနိုင်ငံက တည်ဆောက်ထားတဲ့ နော့ဒ် စထရင်းမ် ဝမ်းနဲ့ တူး ပိုက်လိုင်းတွေ ပေါက်ကွဲမှုအတွက် အနောက်နိုင်ငံတွေကို ရုရှားက အရင်က အပြစ်တင်ခဲ့ပါတယ်။ 

ဒါပေမယ့် ရုရှားဟာ အရင်က ဥရောပဆီ ရုရှားဓာတ်ငွေ့ ထောက်ပံ့မှု အများဆုံး လမ်းကြောင်း ဖြစ်တဲ့ ပိုက်လိုင်းတွေ ပျက်စီးမှုအတွက် ဘယ်သူ့မှာ တာဝန်ရှိတယ်ဆိုတဲ့ အသေးစိတ် အချက်အလက်ကို အရင်က တခါမှ မပြောခဲ့ဖူးပါဘူး။ 

ပျက်စီးဆုံးရှုံးမှုအတွက် ရုရှားမှာ တာဝန်ရှိတယ်ဆိုတဲ့ စွပ်စွဲချက်တွေဟာ မိုက်မဲတာပဲလို့ ရုရှား သမ္မတ နန်းတော်က ထပ်ခါတလဲလဲ ပြောဆိုခဲ့ပါတယ်။

ရုရှားအရာရှိတွေက အမေရိကန် အစိုးရဟာ ဥရောပကို သဘာဝဓာတ်ငွေ့ရည် (LNG) ပိုရောင်းချင်လို့ ရည်ရွယ်ချက်ရှိရှိ လုပ်ခဲ့တာလို့လည်း ပြောခဲ့ပါတယ်။ အမေရိကန်က ပါဝင်ပတ်သက်မှုကို ငြင်းဆိုထားပါတယ်။