ရုရှားက ယူကရိန်းဓာတ်အားပေးစက်ရုံတွေကို တိုက်ခိုက်နေတာဟာ လူတွေကို နေရပ်စွန့်ခွာပြီး အနောက်ဥရောပသမဂ္ဂနိုင်ငံတွေဆီ ရွှေ့ပြောင်းစေလိုတာကြောင့်ဖြစ်တယ်လို့ ယူကရိန်းသမ္မတ ဇလန်းစကီးက အောက်တိုဘာ ၂၀ ရက်မှာ ပြောကြားခဲ့ပါတယ်။

“ရုရှားက ယူကရိန်းနိုင်ငံသားတွေကို အီးယူနိုင်ငံတွေဆီ ရွှေ့ပြောင်းမှုလှိုင်းသစ်ကို လှုံ့ဆော်နေပါတယ်”လို့ ဇလန်းစကီးက အီးယူ ထိပ်သီးအစည်းအဝေး ရုပ်သံမိန့်ခွန်းမှာ ပြောကြားခဲ့တာပါ။

“ရုရှားတွေက ကျနော်တို့ရဲ့ စွမ်းအင်စက်ရုံတွေအပေါ် ကြောက်ရွံ့မှုကြောင့် ယူကရိန်းမှာ အထူးသဖြင့် ဒီဆောင်းဦးနဲ့ ဆောင်းရာသီမှာ လျှပ်စစ်နဲ့ အပူဓာတ် ပြဿနာတွေ အများအပြားကို ဖန်တီးဖို့ရည်ရွယ်တာဖြစ်ပြီး ဒါကြောင့် ယူကရိန်းနိုင်ငံသားတွေက ခင်ဗျားတို့နိုင်ငံတွေဆီ ပြေးကြရတာ” လို့ ဇလန်းစကီးက ပြောပါတယ်။

ရုရှားဟာ နိုင်ငံရဲ့ ဓာတ်အားပေးစက်ရုံ ၃ ပုံ ၁ ပုံလောက်ကို ဖျက်ဆီးခဲ့ပြီးဖြစ်တာကြောင့် ဆောင်းရာသီ နီးကပ်လာတာနဲ့အမျှ လျှပ်စစ်မီးနဲ့ ရေပြတ်တောက်မှုတွေကို ကြုံလာရပြီလို့ ဇလန်းစကီးက အခုသီတင်းပတ် အစောပိုင်းမှာ ပြောကြားခဲ့ပါတယ်။

ကိယက်ဗ်ဟာ နိုင်ငံတဝန်း လျှပ်စစ်ဓာတ်အား ကန့်သတ်ချက်တွေကို အောက်တိုဘာ ၂၀ ရက်မှာ ပထမဆုံးအကြိမ် အမိန့်ထုတ်ခဲ့ပါတယ်။

စစ်မဖြစ်ခင်ကာလက လူဦးရေရဲ့ ၁၉ ရာခိုင်နှုန်းလောက်ရှိတဲ့ ယူကရိန်းနိုင်ငံသား ၇ ဒသမ ၇ သန်းဟာ ဖေဖော်ဝါရီ ၂၄ ရက် ရုရှားကျူးကျော်မှုအပြီး ထွက်ပြေးလာပြီးနောက်မှာ ဥရောပတခွင် နေထိုင်နေကြောင်း ကုလသမဂ္ဂက ပြောပါတယ်။ တချို့ဒုက္ခသည်တွေဟာ လုပ်ခ ထိုက်ထိုက်တန်တန်ရတဲ့ အလုပ်တွေရဖို့ ရုန်းကန်နေရပါတယ်။