မက္ကဆီကိုနယ်စပ်မှာ အောက်တိုဘာ ၃၁ ရက် အစောပိုင်းက စတင်ဖြစ်ပွားခဲ့တဲ့ ဆန္ဒပြမှု တခုအတွင်း နယ်ခြားစောင့်တပ်ဟာ ဗင်နီဇွဲလားနဲ့ ဗဟိုအမေရိကမှ ရွှေ့ပြောင်းနေထိုင်သူတွေကို ရော်ဘာကျည်ဆန်တွေနဲ့ ပစ်ခတ်ခဲ့ပါတယ်။

အမေရိကန်ပြည်ထောင်စုထဲကို ဝင်ရောက်ဖို့ ရီယို ဂရန်ဒီမြစ်ကို ဖြတ်ကျော်လာတဲ့ ရွှေ့ပြောင်းနေထိုင်သူတွေကို နယ်ခြားစောင့်တပ်က စတင်ပစ်ခတ်ချိန်မှာ နောက်ပြန်ဆုတ်သွားကြတာတွေကို ရိုက်တာသတင်းဌာနက ရိုက်ကူးထားတဲ့ ပုံတွေမှာ တွေ့မြင်ရပါတယ်။

ဗင်နီဇွဲလား၊ မက္ကဆီကန်၊ အမေရိကန်နဲ့ ဟွန်ဒူးရပ်စ်အလံတွေကို ကိုင်ဆောင်ထားတဲ့ ရွှေ့ပြောင်းနေထိုင်သူတွေဟာ အမေရိကန်ကို ဝင်ရောက်ခွင့်ပြုဖို့ မက္ကဆီကိုနိုင်ငံ ဆီအူဒဒ် ဝါရက်ဇ်မြို့မှာ တောင်းဆိုဆန္ဒပြခဲ့ကြပါတယ်။

ဗင်နီဇွဲလားမှာ စီးပွားရေးအကျပ်အတည်းကြောင့် နယ်စပ်ဖြတ်ကျော်မှုတွေ တိုးမြင့်လာမှုကို ဟန့်တားဖို့ ကြိုးပမ်းမှုတခုအနေနဲ့ အမေရိကန်ဟာ လူသားချင်းစာနာထောက်ထားမှုဆိုင်ရာ အကူအညီပေးရေး အစီအစဉ်ကနေ ဗင်နီဇွဲလားနိုင်ငံသား ၂၄,၀၀၀ ကို လေကြောင်းမှတဆင့် ဝင်ခွင့်ပေးမယ်လို့ အောက်တိုဘာလတုန်းက ကြေညာခဲ့ပါတယ်။

ဒီမူဝါဒသစ်အရ အမေရိကန်ကို ဝင်ရောက်ဖို့ မျှော်လင့်ချက်ရှိပေမဲ့လည်း ဗင်နီဇွဲလား ရွှေ့ပြောင်းနေထိုင်သူတွေဟာ ဆီအူဒဒ် ဝါရက်ဇ်မြို့က ရီယို ဂရန်ဒီ မြစ်နားမှာ ယာယီတဲစခန်းတခု ဆောက်လုပ်ထားပါတယ်။

မက္ကဆီကိုနဲ့ ဖန်တီးထားတဲ့ မူဝါဒအရ အမေရိကန်ဟာ နယ်စပ်ကို တရားမဝင်ဖြတ်ကျော်ဖို့ ကြိုးစားနေတဲ့ ဗင်နီဇွဲလားနိုင်ငံသားတွေကို ပြန်နှင်ထုတ်လို့လည်း ရပါတယ်။