တူရကီနိုင်ငံ၊ အစ္စတန်ဘူလ်မြို့လယ်က လူသွားလူလာများတဲ့လမ်းမှာ နိုဝင်ဘာ ၁၃ ရက်က ပေါက်ကွဲမှုတခုကြောင့် လူ ၆ ယောက်သေဆုံးပြီး ၈၁ ယောက် ဒဏ်ရာရခဲ့ပါတယ်။

တူရကီသမ္မတ တာယစ်အာဒိုဂံက “ဒါဟာ အကြမ်းဖက်မှုဖြစ်တယ်” လို့ ပြောပါတယ်။ ရဲတွေက အခင်းဖြစ်ပွားတဲ့နေရာဝန်းကျင်ကို အလျှင်အမြန် ပိတ်ဆို့ခဲ့ပြီး လူနာတင်ယာဉ်တွေ အမြန်ရောက်လာခဲ့ပါတယ်။

တူရကီနိုင်ငံရဲ့ အကြီးဆုံးမြို့က ဘေယိုလာခရိုင်အတွင်း ပေါက်ကွဲတဲ့နေရာဟာ သီတင်းပတ်ကုန်ရက်မှာ ဈေးဝယ်သူတွေ၊ ခရီးသွားတွေနဲ့ မိသားစုတွေ ပုံမှန်စည်ကားနေတဲ့ နေရာပါ။

ဒုတိယသမ္မတနဲ့ ပြည်ထဲရေးဝန်ကြီးတို့က ပေါက်ကွဲမှုဖြစ်တဲ့နေရာကို သွားရောက်ကြည့်ရှုခဲ့ပြီး ဒဏ်ရာရသူတွေကို နီးစပ်ရာဆေးရုံဆီ ပို့ဆောင်ပေးခဲ့ပါတယ်။

“ဒါကို အကြမ်းဖက်လုပ်ရပ်အဖြစ် ကျနော်တို့ စိစစ်နေတယ်” လို့ ဒုသမ္မတက သတင်းထောက်တွေကို ပြောပါတယ်။

တကယ်လို့ အကြမ်းဖက်မှုအဖြစ် အတည်ပြုနိုင်ခဲ့ရင် နှစ်ပေါင်းများစွာအတွင်း အစ္စတန်ဘူလ်မှာ ပထမဆုံး ဗုံးပေါက်ကွဲမှု ဖြစ်လာမှာပါ။ ဒီပေါက်ကွဲမှုအတွက် ဘယ်သူကမှ တာဝန်ရှိတယ်လို့ မပြောခဲ့ပါဘူး။

ကာ့ဒ်ခွဲထွက်ရေးသမားတွေ၊ အစ္စလာမ္မစ်စစ်သွေးကြွတွေက အစ္စတန်ဘူလ်နဲ့ တခြား တူရကီမြို့တွေကို အရင်က ပစ်မှတ်ထားပြီး ၂၀၁၅ နဲ့ ၂၀၁၆ ခုနှစ်တွေမှာ ဆက်တိုက် တိုက်ခိုက်ခဲ့ဖူးပါတယ်။