ရခိုင်ပြည်နယ်၊ မောင်တောမြို့အဝင် မြို့သူကြီးကျေးရွာဟောင်းမှာ တည်ဆောက်ထားတဲ့ နယ်ခြားစောင့်တပ်ဖွဲ့ခွဲ နခခ-၅ တပ်ရင်းမှာ နိုဝင်ဘာ ၂ ရက် မနက် ၉ နာရီလောက်က ပေါက်ကွဲပြီး နယ်ခြားစောင့်အရာရှိတချို့နဲ့ တပ်ဖွဲ့ဝင်တချို့ သေဆုံးခဲ့တယ်လို့ မောင်တောရဲတပ်ဖွဲ့ထံက သိရပါတယ်။

ပေါက်ကွဲမှုကြောင့် အရာရှိတချို့လည်း ထိခိုက်ဒဏ်ရာရခဲ့ပြီး မောင်တောခရိုင် ပြည်သူ့ဆေးရုံကြီးမှာ အရာရှိ ၂ ယောက် အပါအဝင် ၆ ယောက် ဆေးကုသမှုခံယူနေရတယ်လို့ ဆိုပါတယ်။

မောင်တောဒေသခံ ရဲအရာရှိတယောက်က“နခခ-၅ က ပေါက်ကွဲတာ ကျနော်တို့ မြို့ဝင်ရဲကင်းဂိတ်စခန်းက မြင်နေရတာ။ မနက် ၉ နာရီကျော်လောက်မှာ ပေါက်ကွဲတာ။ လက်နက်တွေစမ်းသပ်လို့ ပေါက်တာလို့တော့ ပြောနေကြတယ်။ ဒဏ်ရာရသူ အရာရှိနဲ့ တပ်ဖွဲ့ဝင် ၆ ဦးကတော့ မောင်တောဆေးရုံမှာ ဆေးကုသခံနေကြတယ်။ သေဆုံးမှု ဘယ်လောက်ရှိတယ်ဆိုတာ အတိအကျတော့ မသိဘူး။ သေဆုံးမှုတချို့တော့ ရှိတယ်လို့သိရတယ်။ အရေးပေါ်လူနာတွေကို ဘူးသီးတောင် စစ်ဆေးရုံကို ပို့ဆောင်တာရှိတယ်။ ရဟတ်ယာဥ်နဲ့ စစ်တွေခေါ်သွားတာတွေလည်း ရှိတယ်။” လို့ပြောပါတယ်။

နခခ-၅ မှာ ပေါက်ကွဲမှုဖြစ်ပြီး နာရီပိုင်းအကြာမှာ ရွှေဇားကျေးရွာအုပ်စု လှဖိုးခေါင် နယ်ခြားစောင့်စခန်းကို အင်အားဖြည့်တင်းလာတဲ့ စစ်ကောင်စီယာဥ်တန်းကို ရက္ခိုင့်တပ်တော် (အေအေ) က မိုင်းဆွဲတိုက်ခိုက်လို့ စစ်ကောင်စီတပ်ဖွဲ့ဝင်တချို့ ဒဏ်ရာရရှိသလို သေဆုံးသူတချို့လည်း ရှိတယ်လို့ စစ်ရေးလေ့လာသူတွေက ပြောပါတယ်။

“နိုဝင်ဘာ ၂ ရက်နေ့ မနက်ပိုင်း ၉ နာရီလောက်မှာ နခခ-၅ အတွင်းမှာ လက်နက်ကြီးကျည်တွေ ပေါက်ကွဲမှုဖြစ်တယ်။ သေဆုံးမှုတွေရှိတယ်။ ရဟတ်ယာဥ်နဲ့ စစ်တွေခေါ်သွားရတဲ့ လူနာတွေရှိတယ်။ ဘူးသီးတောင်စစ်ဆေးရုံကိုလည်း ပို့ဆောင်ရတာတွေ ရှိတယ်။ မောင်တောဆေးရုံမှာတော့ အရာရှိ ၂ ဦးနဲ့ တပ်ဖွဲ့ဝင်  ၄ ဦး ဆေးကုသမှုခံယူနေ တယ်လို့ သိရတယ်။”

မောင်တောမြို့ နခခ-၅ ဟာ ဘူးသီးတောင်အခြေစိုက် အမှတ်-၁၅ စစ်ဆင်ရေးကွပ်ကဲမှု ဌာနချုပ်ကို ပြောင်းရွှေ့ထားတဲ့ နေရာတခုလည်း ဖြစ်ပါတယ်။