ထိုင်းနိုင်ငံမှာ ဥပဒေမဲ့ တရုတ်စီးပွားရေး လုပ်ငန်းရှင်တွေအကြောင်း စုံစမ်းဖော်ထုတ် သတင်းပေးခဲ့တဲ့ ထိုင်းလွှတ်တော်အမတ်ဟောင်း ချူဝစ်ကမွန်ဝိဆစ်ကို တရားရေးဝန်ကြီးဌာနက ဂုဏ်ထူးဆောင်တံဆိပ်ချီးမြှင့်လိုက်ပြီး မူးယစ်ဆေးဝါးနဲ့ ငွေကြေးခဝါချမှုလုပ်ငန်းက သိမ်းဆည်းရရှိတဲ့ ပမာဏရဲ့ ၅ ရာခိုင်နှုန်း (ဘတ်သန်းပေါင်း ၂၅၀) ကိုလည်း ပေးအပ်မှာ ဖြစ်တယ်လို့ ထိုင်းသတင်းတွေမှာ ဖော်ပြပါတယ်။

ခွန်ချူဝစ်ဟာ ထိုင်းနိုင်ငံမှာ ဥပဒေမဲ့လုပ်ငန်းနဲ့ မူးယစ်ဆေးဝါးပပျောက်ရေးအတွက် ကိုယ်ကျိုးမငဲ့ဘဲ ရဲရဲရင့်ရင့် စုံစမ်းဖော်ထုတ် သတင်းပေးနိုင်သူဖြစ်သလို ပြည်သူတွေအတွက် စံပြပုဂ္ဂိုလ်ဖြစ်တာကြောင့် ဂုဏ်ပြုတဲ့အနေနဲ့ တရားရေးဝန်ကြီးဌာနက “တရားမျှတမှုထိန်းသိမ်းခြင်း” ဆိုင်ရာ ဂုဏ်ထူးဆောင်ရင်ထိုးတံဆိပ်ကို ပေးအပ်တာလို့ တရားရေးဝန်ကြီး နိုင်းဆုမ်ဆဒ်ထိပ်ဆုထင်းက ဒီဇင်ဘာ ၈ ရက် ဆုပေးပွဲအခမ်းအနားမှာ ပြောပါတယ်။

ဒါ့အပြင် သူ့ရဲ့သတင်းပေးမှုကြောင့် ဥပဒေမဲ့လုပ်ငန်းက ဖမ်းဆီးထိန်းသိမ်းခဲ့တဲ့ ပိုင်ဆိုင်မှု ပမာဏ ၅ ရာခိုင်နှုန်းကိုလည်း ခံစားခွင့်ရရှိမှာဖြစ်တယ်လို့ တရားရေးဝန်ကြီးက ဆက်ပြောပါတယ်။

ထိုင်းနိုင်ငံထဲမှာ ဥပဒေမဲ့လုပ်ငန်းတွေ ဝင်ရောက်လုပ်ကိုင်နေတဲ့ တရုတ် စီးပွားရေးလုပ်ငန်းရှင် တုဟောင်နဲ့ ဆက်စပ်နေတဲ့ ပိုင်ဆိုင်မှုတွေကို သက်ဆိုင်ရာက ဆက်တိုက် စစ်ဆေးသိမ်းဆည်းနေရာမှာ လောလောဆယ် ဘတ်သန်းပေါင်း ၁,၁၃၁ တန်ဖိုးရှိ အိမ်ခြံမြေ၊ ဟိုတယ်၊ လေယာဉ်ပျံ၊ မော်တော်ကား အစရှိတဲ့ ပိုင်ဆိုင်မှု ၅၂ မျိုးကို သိမ်းဆည်းထားကြောင်း၊ နောက်ထပ်လည်း ခရီးသည်တင်ကားအစီးပေါင်း ၅၀၀ အပါအဝင် တခြားပိုင်ဆိုင်မှုတွေ သိမ်းယူဖို့ရှိသေးတယ်လို့ ဆိုပါတယ်။

ခွန်ချူဝစ်ရဲ့ သတင်းပေးမှုကြောင့် ဥပဒေမဲ့လုပ်ငန်းတွေကနေ ပိုင်ဆိုင်မှု ဘတ်သန်းပေါင်း ၅,၀၀၀ ကျော် နိုင်ငံပိုင်အဖြစ် သိမ်းဆည်းဖို့ရှိပြီး သတင်းပေးသူက ၅ ရာခိုင်နှုန်းရမှာ ဖြစ်တာကြောင့် ခွန်ချူဝစ်အနေနဲ့ ဘတ်သန်းပေါင်း ၂၅၀ ခန့် ရရှိမှာဖြစ်ပါတယ်။

ဒါ့အပြင် ထိုင်းအမျိုးသားမူးယစ်ဆေးဝါးတိုက်ဖျက်ရေး ကော်မတီရဲ့ အတိုင်ပင်ခံပုဂ္ဂိုလ် အဖြစ်လည်း ကမ်းလှမ်းခံရပါတယ်။

ခွန်ချူဝစ်ကတော့ ဆုလာဘ်၊ ရာထူးတွေကို မမျှော်ကိုးဘဲ တိုင်းပြည်ကို ရာဇဝတ်မှု ကင်းစင်အောင် ကူညီလိုတဲ့စိတ်နဲ့ ဆောင်ရွက်ခြင်းသာဖြစ်ကြောင်း၊ ဂုဏ်ထူးဆောင်တံဆိပ် ရတဲ့အတွက် ဂုဏ်ယူဝမ်းမြောက်ကြောင်း၊ ကော်မတီအတိုင်ပင်ခံရာထူးကိုလည်း မယူ၊   သူ့အနေနဲ့ စားဝတ်နေရေး ပြည့်စုံပြီဖြစ်လို့ ဆုကြေး ၅ ရာခိုင်နှုန်းကိုလည်း တပြားတချပ်မှမယူဘဲ ချို့တဲ့တဲ့ဆေးရုံတွေကို အကုန်လှူဒါန်းသွားမယ်လို့ ပြောသွားပါတယ်။

သူဟာ ဥပဒေမဲ့လုပ်ငန်းတွေ လုပ်ကိုင်နေတဲ့ တရုတ်သူဌေးတွေအကြောင်း စုံစမ်း ဖော်ထုတ်ခဲ့တဲ့အပြင် ထိုင်းအစိုးရဝန်ထမ်းတွေရဲ့ အကျင့်ပျက် ခြစားမှုတွေကိုလည်း ဖော်ထုတ်ခဲ့ပါတယ်။ အကျင့်ပျက်ဝန်ထမ်းတွေကို အရေးယူဖို့လည်း ထိုင်းရဲချုပ်၊ ဝန်ကြီးချုပ် စတဲ့ ထိပ်တန်းခေါင်းဆောင်တွေကို ရဲရဲဝံ့ဝံ့ ဖိအားပေးခဲ့ပါတယ်။