အမေရိကန်ပြည်ထောင်စု၊ ယူးထားပြည်နယ်ရှိ နှင်းလျှောစီးကွင်းတခုမှာ ဒီဇင်ဘာ ၁၃ ရက်က နှင်းလျှောစီးသမားတယောက်ရဲ့ ရုပ်အလောင်းကို တွေ့ရှိခဲ့ပြီး ပြင်းထန်တဲ့ ဆောင်းရာသီ အခြေအနေကလည်း အမေရိကန်ရဲ့ နေရာအနှံ့အပြားကို လွှမ်းခြုံထားပါတယ်။

အာဏာပိုင်တွေရဲ့ ပြောကြားချက်အရ နှင်းလျှောစီးသူဟာ ဒီဇင်ဘာ ၁၂ ရက် မနက်ပိုင်းက သူငယ်ချင်းတယောက်နဲ့အတူ Big Cottonwood Canyon တောင်စောင်းမှာ ရှိနေခဲ့ပြီး သူ့ဘာသာသူ ပြန်နေဖို့ ဆုံးဖြတ်ခဲ့တယ်လို့ ဆိုပါတယ်။

နောက်တော့ တနင်္လာနေ့ညနေပိုင်းမှာ သူ ပြန်မလာတော့ဘဲ ပျောက်ဆုံးသွားကြောင်း သတင်းပေးပို့ခဲ့ပါတယ်။

တနင်္လာနေ့မှာ ရှာဖွေရေး ကြိုးပမ်းမှုတွေကို စတင်ခဲ့ပေမဲ့ နှင်းထူထပ်တဲ့ အခြေအနေတွေကြောင့် ဖျက်သိမ်းခဲ့ရတာပါ။

အင်္ဂါနေ့မနက်မှာတော့ နှင်းလျှောစီးသူရဲ့ အလောင်းကို သစ်ပင်တွေကြားထဲမှာ တွေ့ရှိခဲ့ပါတယ်။

ရဲအရာရှိ မယ်လဒီ ကတ်တရာက “အမှောင်ထုက အရမ်းခက်ခဲတဲ့အပြင် အေးခဲတဲ့ရာသီဥတုပါ ပေါင်းလိုက်တော့ ကယ်ဆယ်ရေးသမားတွေအတွက် တကယ်ကိုခက်ခဲပြီး အန္တရာယ်ဖြစ်စေပါတယ်။ ဒါကြောင့် ဒီလိုအခြေအနေမျိုးမှာ နောက်ထပ် အသက်အန္တရာယ်မရှိစေဖို့ အချိန်စောင့်ရပါတယ်” လို့ ပြောပါတယ်။

မြောက်ဒါကိုတာမှာ နှင်းမုန်တိုင်းလို ရာသီဥတု အခြေအနေမျိုးကိုလည်း သတင်းထုတ်ပြန်ထားတာပါ။

ဒေသတွင်းရှိ တချို့နေရာတွေမှာ နောက် ၂ ရက်အတွင်း ဆီးနှင်းတွေ ၂ ပေလောက် ထူထပ်ပြီး လေတိုက်နှုန်းက တနာရီကို မိုင် ၆၀ လောက်ရှိမယ်လို့ အမျိုးသား မိုးလေဝသဌာနက ထုတ်ပြန်ခဲ့ပါတယ်။

ဒေသအနှံ့ အပူချိန်ဟာ အနုတ် ၂၀ ဒီဂရီဖာရင်ဟိုက်အထိ ကျဆင်းနိုင်တယ်လို့ မိုးလေဝသ ပညာရှင်တွေက သတိပေးထားပြီး အဲဒီအပူချိန်ဟာ မိနစ် ၃၀ အတွင်း ထိတွေ့တဲ့ အရေပြားပေါ် နှင်းကိုက်ခြင်းကို ဖြစ်ပေါ်စေတဲ့အဆင့်လည်း ဖြစ်ပါတယ်။