မန်ယူအသင်းအနေနဲ့ တိုးတက်မှုတွေရှိလာဖို့ လိုအပ်နေသေးပေမဲ့ ပရိသတ်တွေအနေနဲ့ ဆုဖလား ရယူနိုင်ဖို့ မျှော်လင့်နိုင်ပြီဖြစ်ကြောင်း နည်းပြတန်ဟတ်ဂ်က ပြောပါတယ်။

ဒါဘီပြိုင်ဘက် မန်စီးတီးအသင်းကို ၂ ဂိုး ၁ ဂိုးနဲ့ အိုးထရတ်ဖို့ဒ်ကွင်းမှာ အနိုင်ယူပြီးနောက် မန်ယူအသင်းပရိသတ်တွေအနေနဲ့ ဆုဖလား မျှော်လင့်ချက် စတင်ထားရှိနိုင်ကြောင်း နည်းပြတန်ဟတ်ဂ်က ပြောခဲ့တာပါ။

“ပရိသတ်တွေအနေနဲ့ ချန်ပီယံဆုဖလားရယူနိုင်ဖို့အတွက် စတင်အိပ်မက်မက်လို့ရနိုင်ပါပြီ။ အသင်းကတိုးတက်လာတာတွေရှိပေမယ့် လိုအပ်ချက်တွေတော့ ရှိပါသေးတယ်။ ရှေ့ဆက်ကြိုးပမ်း သွားဖို့လိုပါတယ်။ ဘောလုံးမှာ သေးငယ်တဲ့အရာလေးတွေကနေတဆင့် သက်ရောက်မှုရှိတာဖြစ်လို့ ဆက်ပြီးကြိုးစားနေဖို့လိုပါတယ်”လို့ နည်းပြတန်ဟတ်ဂ်ကပြောပါတယ်။

မန်ယူအသင်းဟာ မန်စီးတီးကို အနိုင်ယူခဲ့လို့ အမှတ်ပေးဇယားအဆင့် ၃ နေရာမှာ ရပ်တည်နေ ပါတယ်။

ထိပ်ဆုံးက အာဆင်နယ်ထက်တစ်ပွဲပိုကစားပြီး ၆ မှတ်ပဲကွာဟတော့တာဖြစ်ပါတယ်။