ကျောင်းသားတွေ အဆိပ်သင့်တဲ့ကိစ္စကို အီရန်အစိုးရက စုံစမ်းစစ်ဆေးမယ်လို့ ကျန်းမာရေးဝန်ကြီး ဘာရမ် အီနိုလာဟီက မတ် ၂ ရက်မှာ ပြောလိုက်ပါတယ်။

ဒီကိစ္စကို စုံစမ်းစစ်ဆေးဖို့ အထူးကော်မတီတရပ် ဖွဲ့စည်းတာဝန်ချပြီးပြီ ကော်မတီထဲမှာ အတော်ဆုံး အဆိပ်ဗေဒပညာရှင်နဲ့ တက္ကသိုလ်ပါမောက္ခတွေပါတယ်လို့ အီနိုလာဟီက ပြောပါတယ်။
လတ်တလော လတွေအတွင်း မတူတဲ့ ကျောင်းတွေက အီရန် မိန်းကလေးကျောင်းသူ ရာချီဟာ အပျော့စား အဆိပ်နဲ့ တိုက်ခိုက်မှုဒဏ်ကို ခံစားခဲ့ရတယ်လို့ ကျန်းမာရေ‌ေဝန်ကြီးက ဖေဖော်ဝါရီလ ထဲမှာ ပြောခဲ့ဖူးပါတယ်။

ဒါဟာ မိန်းကလေးသင် ပညာရေးကို ဆန့်ကျင်တဲ့ ဘာသာရေးအုပ်စုတွေကို ပစ်မှတ်ထားတာ ဖြစ်နိုင်တယ်လို့ နိုင်ငံရေးသမားတချို့က အဆိုပြုခဲ့ကြပါတယ်။

အီရန်နိုင်ငံက ရှီးယိုက် မွတ်စလင်တွေရဲ့ ဘာသာရေးမြို့ ဖြစ်တဲ့ ခွန်းမ်မြို့မှာ နိုဝင်ဘာလက စခဲ့ပြီး မြို့ ၄ မြို့ထက်မနည်းက ကျောင်း ၃၀ ကျော်မှာ အဆိပ်နဲ့ တိုက်ခိုက်တာ ခံခဲ့ရလို့ တချို့ ကျောင်းသားမိဘတွေက သူတို့ရဲ့ ကလေးတွေကို ကျောင်းထုတ်ခဲ့ကြတယ်လို့ အစိုးရ မီဒီယာက ဖော်ပြပါတယ်။

လတ်တလော လတွေအတွင်း မတူတဲ့ ကျောင်းတွေမှာ မိန်းကလေးတွေ အဆိပ်နဲ့ တိုက်ခိုက်ခံရတဲ့ ကိစ္စကို အီရန်အစိုးရက စုံစမ်းစစ်ဆေးဖို့ အမေရိကန်က အီရန်ကို မတ် ၁ ရက်က တိုက်တွန်းခဲ့တယ်လို့ အမေရိကန်အစိုးရ ပြောခွင့်ရက ပြောခဲ့ပါတယ်။