စပိန်နိုင်ငံအရှေ့မြောက်ပိုင်း ဆူရီယာမြို့ရှိ အနောက်ဥရောပရဲ့ အကြီးမားဆုံး ပိုတက်ရှ်မိုင်းတခုမှာ မတ်လ ၉ ရက်က မြေအောက်ပြိုကျမှုကြောင့် အလုပ်သမား ၃ ဦး သေဆုံးခဲ့ကြောင်း ဒေသဆိုင်ရာသမဂ္ဂ USOC က ပြောပါတယ်။

တဲလ်အဗစ်အခြေစိုက် ICL အုပ်စုလီမိတက်ရဲ့ လက်အောက်ခံ အီဘာပိုတက်ရှ်ကုမ္ပဏီက လုပ်ကိုင်နေတဲ့ အဲဒီမိုင်းတွင်းပြိုကျမှုဟာ ဒေသစံတော်ချိန် မနက် ၉ နာရီလောက်က မြေအောက်အနက် မီတာ ၉၀၀ လောက်မှာ ဖြစ်ပွားခဲ့ကြောင်း မီးသတ်သမားတွေက ပြောပါတယ်။

“ကံဆိုးစွာနဲ့ မြေအောက် မတော်တဆမှုတခု ဖြစ်ပွားခဲ့ကြောင်း” ICL အုပ်စုလီမိတက်က ထုတ်ပြန်ပါတယ်။

အာဏာပိုင်တွေဟာ အခုသေဆုံးမှုကို အတည်ပြုနိုင်ခြင်း မရှိသေးပေမဲ့ အဆိုးဆုံး ဖြစ်သွားမှာကို စိုးရိမ်ကြောင်း ကက်တလန် ဒေသဆိုင်ရာအစိုးရ ပြည်ထဲရေးဌာနအကြီးအကဲ ဂျွမ်နစ် နာဆီ လဲနာက သတင်းစာရှင်းလင်းပွဲမှာ ပြောပါတယ်။

သူတို့မရောက်မချင်း မိုင်းတွင်းလုပ်သားတွေကို ဘယ်သူဘယ်ဝါ မဖော်ထုတ်နိုင်သေးကြောင်းနဲ့ အဲလိုဖော်ထုတ်ဖို့ကလည်း နာရီပေါင်းများစွာ ကြာမြင့်နိုင်ကြောင်း ဆိုပါတယ်။

မိုင်းတွင်းရှိ ကျန်အလုပ်သမားတွေကိုတော့ ဘေးလွတ်ရာကို ရွှေ့ပြောင်းပေးထားကြောင်းလည်း ပြောပါတယ်။

ဘာစီလိုနာမြို့ရဲ့ မြောက်ဘက် ကီလိုမီတာ ၈၀ လောက်မှာ တည်ရှိတဲ့ မိုင်းတွင်းဟာ ဖေဖော်ဝါရီလကပဲ ဘေးကင်းရေးစစ်ဆေးမှုကို အောင်မြင်ခဲ့ကြောင်း ကက်တလိုနီးယားရဲ့ စီးပွားရေးဌာနမှ ထိပ်တန်းအရာရှိ ရိုဂါ တောရန့်က ပြောခဲ့ပါတယ်။