အီရန်နဲ့ ဆော်ဒီအာရေဗျနိုင်ငံတို့ဟာ ပင်လယ်ကွေ့အတွင်း တည်ငြိမ်ရေးနဲ့ လုံခြုံရေးကို ခြိမ်းခြောက်နေပြီး ယီမင်မှ ဆီးရီးယားအထိ အရှေ့အလယ်ပိုင်းရှိ ပဋိပက္ခတွေကို မီးထိုးပေးခဲ့တဲ့ နှစ်ပေါင်းများစွာ ရန်လိုမှုတွေအပြီးမှာ ဆက်ဆံရေးပြန်လည်ထူထောင်ကြဖို့ မတ် ၁၀ ရက်မှာ သဘောတူခဲ့ကြပါတယ်။ 

အရှေ့အလယ်ပိုင်း အင်အားကြီး ပြိုင်ဘက် ၂ နိုင်ငံမှ ထိပ်တန်း လုံခြုံရေးအရာရှိတွေအကြား အရင်က ထုတ်မပြခဲ့တဲ့ ပေကျင်းကဆွေးနွေးပွဲတွေအပြီး ၄ ရက်အကြာမှာ အဲဒီ သဘောတူညီချက်ကို ထုတ်ပြန်ခဲ့ခြင်းဖြစ်ပါတယ်။ 

တီဟီရန်နဲ့ ရီယာ့ဒ်တို့ဟာ သံတမန်ဆက်ဆံရေး ပြန်စတင်ဖို့နဲ့ သံရုံးတွေကို ၂ လအတွင်း ပြန်ဖွင့်ဖို့ သဘောတူညီခဲ့ကြကြောင်း အီရန်၊ ဆော်ဒီအာရေးဗီးယားနဲ့ တရုတ်နိုင်ငံတို့က ထုတ်ပြန်တဲ့ ကြေညာချက်မှာ ဖော်ပြထားပါတယ်။ 

အီရန်နိုင်ငံရဲ့ ထိပ်တန်းလုံခြုံရေးအရာရှိ အလီရှမ်ခါနီနဲ့ ဆော်ဒီအမျိုးသား လုံခြုံရေးအကြံပေး မူဆေ့ဒ်ဘင်န် မိုဟာမက်အလ်အိုင်ဘန်တို့ လက်မှတ်ရေးထိုးခဲ့တဲ့ သဘောတူညီချက်ဟာ ၂၀၀၁ ခုနှစ် လုံခြုံရေးပူးပေါင်းဆောင်ရွက်မှု သဘောတူညီချက်အပြင် ကုန်သွယ်ရေး၊ စီးပွားရေးနဲ့ ရင်းနှီးမြှုပ်နှံမှုဆိုင်ရာ အစောပိုင်း သဘောတူညီချက်ကို ပြန်အသက်သွင်းဖို့ သဘောတူခဲ့ကြပါတယ်။ 

တရုတ်နိုင်ငံရဲ့ ထိပ်တန်းသံတမန်ဝမ်ယိ  ဒီသဘောတူညီချက်ဟာ တွေ့ဆုံဆွေးနွေးရေးနဲ့ ငြိမ်းချမ်းရေးအတွက် အောင်ပွဲတစ်ခုဖြစ်ကြောင်း ဖော်ပြခဲ့ပါတယ်။ 

ခက်ခဲတဲ့ ကမ္ဘာ့ပြဿနာတွေကို ဖြေရှင်းရာမှာ ပေကျင်းက အပြုသဘောဆောင်တဲ့ အခန်းကဏ္ဍမှ ဆက်လက်ပါဝင်နေမှာဖြစ်ကြောင်းလည်း ထည့်သွင်းပြောကြားခဲ့ပါတယ်။

ဆော်ဒီအာရေဗျဟာ ၂၀၁၆ ခုနှစ်က ရီယာ့ဒ်ဟာ ရှီးယိုက် မွတ်စလင် ဘာသာရေးဆရာတစ်ဦးကို ကွပ်မျက်လိုက်တဲ့အပေါ် နှစ်နိုင်ငံအကြား အငြင်းပွားချိန်အတွင်း တီဟီရန်ရှိ ဆော်ဒီသံရုံးကို စီးနင်းတိုက်ခိုက်ခံရပြီးနောက်မှာ အီရန်နဲ့ အဆက်အသွယ် ဖြတ်ခဲ့တာပါ။ 

ဆော်ဒီအာရေဗျဟာ ၂၀၁၉ ခုနှစ်က သူ့ရဲ့ရေနံစက်ရုံတွေကို ဒုံးကျည်နဲ့ဒရုန်း တိုက်ခိုက်မှုတွေအပြင် ပင်လယ်ကွေ့ရေပြင်မှာ ရေနံတင်သင်္ဘောတွေကို တိုက်ခိုက်တာတွေအတွက် လတ်တလောနှစ် တွေမှာ အီရန်နိုင်ငံကို အပြစ်တင်ခဲ့ပါတယ်။ အီရန်ကတော့ စွဲချက်တွေကို ငြင်းဆိုထားပါတယ်။ 

ဟူသီသူပုန်တွေကို တိုက်ခိုက်နေတဲ့ ညွန့်ပေါင်းအဖွဲ့ကို ဦးဆောင်နေတဲ့ ဆော်ဒီအာရေဗျနိုင်ငံထဲကို ယီမင်ရဲ့ အီရန်မဟာမိတ် ဟူသီသူပြန်တွေက နယ်စပ်ဖြတ်ကျော် ဒုံးကျည်နဲ့ ဒရုန်းတွေနဲ့ တိုက်ခိုက်မှုတွေ လုပ်ခဲ့ပြီး ၂၀၂၂ ခုနှစ်မှာလည်း ယူအေအီး ရင်းနှီးမြှုပ်နှံမှုတွေကို တိုက်ခိုက်ခဲ့ကြပါတယ်။