အခုရက်သတ္တပတ်အတွင်း မြန်မာနိုင်ငံ ဒေသအတော်များများမှာ အချိန်အခါမဟုတ် ပျံကျ မိုးတွေ ထစ်ချုန်းရွာလာနိုင်တယ်လို့ အမျိုးသားညီညွတ်ရေး အစိုးရ (NUG) က ခန့်မှန်းထုတ်ပြန်ပါတယ်။

ဧပြီ ၁၇ ရက်မှ ၂၃ ရက်အထိ ရက်သတ္တပတ် မိုးလေဝသခန့်မှန်းချက် ထုတ်ပြန်ထားတာဖြစ်ပြီး အခုတပတ်မှာတော့ အပူချိန်အပေါ်မူတည်ပြီးတော့ လေဖိအားစနစ် ပြောင်းလဲလာမှုဟာ အရင်နှစ်တွေနဲ့ မတူကွဲပြားသော လေတိုက်ခတ်မှု ဖြစ်ပေါ်လာနေစေတာကို ပြသလာတယ်လို့ ဆိုပါတယ်။

မုတ်သုံလေဦးကို စောင့်ဆိုင်းနေတဲ့ မြန်မာနိုင်ငံအလယ်ပိုင်းမှ လေဖိအားလျော့နည်းရပ်ဝန်းဟာ အနောက်မြောက်ဘက်ကနေ အင်အားကောင်းစွာ ထိုးဆင်းလာနေတဲ့ လေတွေကြောင့် မုတ်သုံလေဦးကို လက်ခံနိုင်ခြင်းမရှိတဲ့ အခြေအနေမျိုးဖြစ်စေကာ အဆိုပါ လေတိုက်ခတ်မှုပုံစံတွေ စတင်ပြောင်းလဲလာနိုင်ပြီး မြန်မာနိုင်ငံဒေသ အတော်များများမှာ အချိန်အခါမဟုတ် ပျံကျမိုးတွေ ထစ်ချုန်းရွာလာနိုင်တယ်လို့ ခန့်မှန်းထားတာပါ။

ဒါ့အပြင် မိုးကြောင့် အလယ်ပိုင်းဒေသတွေမှာတော့ နေ့အပူချိန်တွေ ပြန်လည်လျော့ကျ လာနိုင်တယ်လို့လည်း ခန့်မှန်းထားပါတယ်။