ထိုင်းနိုင်ငံမှာ လာမယ့် မေလ ၁၄ ရက် ပါတီစုံဒီမိုကရေစီရွေးကောက်ပွဲ ကျင်းပတော့မှာမို့ သက်ဆိုင်ရာ နိုင်ငံရေးပါတီအသီးသီးက အွန်လိုင်းမှာရော မြေပြင်မှာပါ ကွင်းဆင်းပြီး သူ့ထက်ငါအပြိုင် မဲဆွယ်စည်းရုံးရေးတွေ လုပ်ဆောင်နေကြပါတယ်။

အဲဒီလို မဲဆွယ်စည်းရုံးရာမှာ တဖက်ပါတီကို နစ်နာအောင် ပုတ်ခတ်ပြောဆိုပြုမူတာ၊ ပါတီဝင်နဲ့ ကိုယ်စားလှယ်လောင်းက ငွေကြေး ဒါမှမဟုတ် တံစိုးလက်ဆောင်ပစ္စည်းတွေ ပေးပြီး မိမိပါတီနဲ့ အမတ်လောင်းကို မဲထည့်အောင် စည်းရုံးတာ အစရှိတဲ့ မသမာမှုတွေ တွေ့ရှိတယ်ဆိုရင် ရွေးကောက်ပွဲကော်မရှင်ကို သက်သေအထောက်အထားနဲ့တကွ အကြောင်းကြားနိုင်ပြီး ပြစ်မှုအကြီးအသေးပေါ်မူတည်ကာ သတင်းပေးသူကို ဆုငွေ အနည်းဆုံး ဘတ် ၁၀၀,၀၀၀ မှ ၁,၀၀၀,၀၀၀ ထိ ချီးမြှင့်မှာဖြစ်တယ်လို့ ထိုင်းနိုင်ငံရဲ့ ၂၀၂၃ ရွေးကောက်ပွဲကော်မရှင်က ဧပြီ ၁၅ ရက်မှာ ထုတ်ပြန်ကြေညာထားပါတယ်။

သတင်းပေးရာမှာ လမ်းကြောင်း ၄ ခုရှိကြောင်း၊ ပထမနည်းမှာ ရွေးကောက်ပွဲကော်မရှင်ရဲ့ နာနတ်သီးပုံ အမှတ်တံဆိပ်ပါ အပလီကေးရှင်းကို ဒေါင်းလုတ်ဆွဲပြီး အဆိုပါ အပလီကေးရှင်းကို ပေးပို့တိုင်ကြားခြင်း၊ ရွေးကောက်ပွဲကော်မရှင် အရေးပေါ်ဖုန်းလိုင်း ၁၄၄၄ ကိုလည်းကောင်း၊ ၀၂ ၁၄၁၈၈၆၀ / ၀၂ ၁၄၁၈၅၇၉ / ၀၂၁၄၁၈၈၅၈ စတဲ့ဖုန်းနံပါတ် ဒါမှမဟုတ် ဘန်ကောက်အပါအဝင် သက်ဆိုင်ရာ ခရိုင်/မြို့နယ် ရွေးကောက်ပွဲကော်မရှင်ရုံး အသီးသီးမှာ သွားရောက်တိုင်ကြားနိုင်တယ်လို့ ဆိုပါတယ်။

သတင်းပေးသူရဲ့ လုံခြုံရေးနဲ့ အချက်အလက်တွေကို ရွေးကောက်ပွဲကော်မရှင်နဲ့ နယ်မြေခံရဲတပ်ဖွဲ့က တာဝန်ယူ ထိန်းသိမ်းပေးမယ်လို့လည်း ကြေညာထားပါတယ်။

တရုတ်မာဖီးယားဂိုဏ်းနဲ့ ထိုင်းဝန်ထမ်းတွေ အဂတိလိုက်စားမှုတွေ ဖော်ထုတ်နေသူ လွှတ်တော်အမတ်ဟောင်း ခွန်ချူဝစ် ကမွန်ဝဆစ် ဆိုသူကလည်း ငွေကြေးလက်ဆောင်တွေ ပေးနေ/ရယူနေတဲ့ ဗွီဒီယိုဖိုင် အထောက်အထား ပေးနိုင်သူကို သူ့ကိုယ်ပိုင်ငွေနဲ့ ဘတ် ၁၀,၀၀၀ ဆုချမယ်လို့ ကြေညာထားပါတယ်။