မြို့တော် ခါတွမ်မှာ ပြင်းထန်တဲ့ပစ်ခတ်သံတွေ ကြားနေရတဲ့ကြားမှာ ဆူဒန်နိုင်ငံရှိ အမေရိကန် နိုင်ငံသားတွေဟာ အမေရိကန်အစိုးရရဲ့ ညှိနှိုင်းမှုနဲ့ နိုင်ငံတွင်းကနေ ဘေးလွတ်ရာ ရွှေ့ပြောင်းဖို့ မမျှော်လင့်သင့်ဘူးလို့ နိုင်ငံခြားရေးဌာန လက်ထောက်ပြောရေးဆိုခွင့်ရှိသူ ဗီဒန့်ပါတေးလ် က ဧပြီ ၂၁ ရက်မှာ ပြောပါတယ်။

ခါတွမ်လေဆိပ်ကို ပိတ်ထားရပြီး နိုင်ငံတွင်း မရေရာတဲ့ လုံခြုံရေးအခြေအနေကြောင့် နိုင်ငံသားတွေအနေနဲ့ ကိုယ့်အစီအစဉ်နဲ့ကိုယ် ဘေးကင်းလုံခြုံအောင် နေဖို့လည်း စီစဉ် ဆောင်ရွက်သင့်ကြောင်း ပါတေးလ်က သတင်းထောက်တွေကို သတင်းစာရှင်းလင်းပွဲမှာ ပြောကြားခဲ့ပါတယ်။

ဆူဒန်မှာ နေထိုင်တယ်လို့ သိထားတဲ့ ရာနဲ့ချီတဲ့ပုဂ္ဂလိက အမေရိကန်နိုင်ငံသားတွေကိုလည်း ဆက်သွယ်နေကြောင်းနဲ့ အဲဒီအထဲက အတော်များများကို အမေရိကန်ရဲ့ စမတ်ခရီးသွား ပရိုဂရမ် ကနေတဆင့် မှတ်ပုံတင်ထားကြောင်းလည်း သူက ပြောပါတယ်။ 

စမတ်ခရီးသွား ပရိုဂရမ်ဟာ လုံခြုံရေးသတိပေးချက်တွေနဲ့ သူတို့ကိုယ်တိုင်လုပ်ဆောင်နိုင်တဲ့ တခြားအစီအမံတွေအကြောင်း ပြောဆိုဖို့အတွက် သူတို့နဲ့တိုက်ရိုက်ဆက်သွယ်မှုပြုလုပ်ထားတဲ့ ယန္တရား တစ်ခုဖြစ်ပါတယ်။ 

အမေရိကန်နိုင်ငံသားတွေဟာ အခုကနေ လနဲ့ချီပြီး ဆူဒန်ကို လုံးဝမသွားလာသင့်ကြောင်းကို ရှင်းရှင်းလင်းလင်းမြင်နေရပြီး ဆူဒန်ဟာ ၂၀၂၁ ခုနှစ် ဩဂုတ်လကတည်းက အဆင့် ၄ နိုင်ငံဖြစ်နေလို့ အဲဒီအချိန်ကတည်းက ဆူဒန်နိုင်ငံတွင်းရှိ အမေရိကန်နိုင်ငံသားတွေ ဘေးကင်းမှုနဲ့ လုံခြုံရေးအစီအမံတွေ၊ ကြိုတင်ကာကွယ်မှုတွေအကြောင်း အကြောင်းကြားထားတယ်လို့လည်း ဆိုပါတယ်။ 

မကြာသေးမီရက်တွေအတွင်းမှာ အကြမ်းဖက်မှုတွေ မြင့်တက်လာတာကို မြင်တွေ့ခဲ့ရလို့ လုံခြုံရေးဆိုင်ရာလုပ်ငန်းစဉ်ကိုလည်း မြှင့်တင်ခဲ့ကြောင်း ပြောပါတယ်။ 

သံအမတ်ကြီး ဂျွန်ဂေါ့ဒ်ဖှရေးနဲ့အဖွဲ့ဟာ သူ့အဖွဲ့နဲ့ အမေရိကန်ပြည်သူတွေကို ဘေးကင်းစေဖို့ အတွက် သင့်လျော်တဲ့ လုပ်ငန်းစဉ်တွေကို လုံ့လစိုက်ထုတ်ပြီး ဆက်လက်လုပ်ဆောင် သွားမှာဖြစ်ကြောင်း နိုင်ငံခြားရေးဌာနလက်ထောက် ပြောရေးဆိုခွင့်ရှိသူ ဗီဒန့်ပါတေးလ်က ပြောပါတယ်။