ကမ္ဘာ့ဖလားခြေစစ်ပွဲတွေကစားဖို့ ဂျပန်နိုင်ငံမှာ လေ့ကျင့်ခန်းဆင်းနေတဲ့ မြန်မာ့လက်ရွေးစင် ဘောလုံးအသင်းလူစာရင်းကို မြန်မာဘောလုံးအဖွဲ့ချုပ်က တရားဝင်ထုတ်ပြန်ခြင်းမရှိသေးပေမယ့် အဓိက ကစားသမား ၁၀ ဦးလောက် လိုက်ပါလာခြင်းမရှိဘူးလို့ စုံစမ်းသိရပါတယ်။

လက်ရှိ ဂျပန်မှာလေ့ကျင့်နေတဲ့ လူစာရင်းထဲမှာ ကစားသမား ၂၄ ဦး လိုက်ပါလာတယ်လို့သိရပြီး ပြည်ပထွက်ကစားတဲ့သူတွေထဲကနေ ဆွမ်လမ်မန် တစ်ဦးသာပါဝင်ခဲ့ပြီး ပြည်တွင်းကလပ်တွေက ကစားသမားအများစုကို  ရွေးချယ်လာတာတွေ့ရပါတယ်။

ဂိုးသမားနေရာမှာ ဟံသာဝတီယူနိုက်က ကိုကိုနိုင်၊ ရတနာပုံအက်ဖ်စီက ပြည့်လျှံအောင်နဲ့ ရန်ကုန် ယူနိုက်တက် ဂိုးသမား ဆန်းဆက်နိုင်တို့ပါဝင်ပါတယ်။

နောက်ခံလူတွေအနေနဲ့ ရှမ်းယူနိုက်တက်က ဒေးဗစ်ထန်၊ ရဲမင်းသူ၊ ဟံသာဝတီယူနိုက်တက် က ရဲရင့်အောင်၊ ဟိန်းထက်စည်သူ၊ ရတနာပုံအက်ဖ်စီက ဇော်ရဲထွန်း၊ ဧရာဝတီယူနိုက်တက်က စိုးမိုးကျော်နဲ့ ရန်ကုန်ယူနိုက်တက်က သိန်းသန်းဝင်းတို့ပါဝင်ပါတယ်။

ကွင်းလယ်မှာတော့ ရတနာပုံအက်ဖ်စီက  လှိုင်းဘိုဘို၊ မြတ်ကောင်းခန့်၊ ဧရာဝတီယူနိုက်တက်က တင်ဝင်းအောင်၊ လွင်မိုးအောင်၊ ရန်ကုန်ယူနိုက်တက်က မောင်မောင်လွင်၊ ရန်နိုင်ဦး၊ မောင်မောင်ဝင်း၊ ငြိမ်းချမ်းအောင်၊ ဟံသာဝတီယူနိုက်တက်က လာဒင်မောရာ တို့ပါဝင်ပါတယ်။

တိုက်စစ်ပိုင်းမှာတော့ မကွေးအက်ဖ်စီက ပြေမိုး၊ ရှမ်းယူနိုက်တက်က ထက်ဖြိုးဝေ၊ ထိုင်းကလပ် ရနောင်းယူနိုက်တက်က ဆွမ်လမ်မန်၊ ဧရာဝတီယူနိုက်တက်က  သန်းထက်အောင်နဲ့ ဝင်းနိုင်ထွန်းတို့ ပါဝင်တယ်လို့သိရပါတယ်။

လက်ရွေးစင်အသင်းမှာ အမြဲလိုလိုရွေးချယ်ခံခဲ့ရပြီး လူစာရင်းမှာပါဝင်ခြင်းမရှိတဲ့ ကစားသမားတွေထဲမှာတော့ ဂိုးသမား ကျော်ဇင်ထက်၊ ကျော်ဇင်ဖြိုး၊ နောက်ခံလူတွေထဲမှာ ဇော်မင်းထွန်း၊ ထိုက်ထိုက်အောင်၊ ချမ်းငြိမ်း၊ နန္ဒကျော် ၊ ကွင်းလယ်ပိုင်းက ဟိန်းထက်အောင်၊ စည်သူအောင်၊ တိုက်စစ်မှူးတွေထဲက ကျော်ကိုကို၊ အောင်သူ၊ ဇင်မင်းထွန်း၊ အောင်ကောင်းမာန်တို့ ဖြစ်ပါတယ်။

မြန်မာအသင်းက မေလ ၂၈ ရက်မှာ ဂျပန်လက်ရွေးစင်အသင်းနဲ့ ကစားရမှာဖြစ်ပြီး ကာဂျစ်ကစ္စတန်နဲ့ အိမ်ကွင်းပွဲစဉ်အဖြစ် ဂျပန်မှာပဲ ဆက်ကစားသွားမှာဖြစ်ပါတယ်။

မြန်မာနိုင်ငံမှာ ဘောလုံးသမားတွေအပါအဝင် ပြည်သူလူထုကို  အကြမ်းဖက်စစ်အုပ်စုက ပစ်ခတ်သတ်ဖြတ် ဖမ်းဆီးနေချိန်မှာ ဂျပန်မှာဘောလုံးလာကန်တဲ့  မြန်မာဘောလုံးသမားတွေကို ဂျပန်ရောက်မြန်မာ့အရေးလှုပ်ရှားသူတွေက ကန့်ကွက်ဆန္ဒပြဖို့  စီစဉ်နေကြပါတယ်။