ပြင်သစ်အသင်းအနေနဲ့ ကွင်းလုံးပြည့်ပရိသတ်တွေရဲ့ရှေ့မှာ ဘယ်လိုကစားရမလဲဆိုတာ မေ့လျော့နေကြတယ်လို့ တိုက်စစ်မှူး ဂရစ်ဇ်မန်းက ပြောပါတယ်။

ရေပန်းအစားဆုံးပြင်သစ်ဟာ မနေ့က ကစားခဲ့တဲ့ အိမ်ရှင်ဟန်ဂေရီနဲ့ပွဲမှာ ၁ ဂိုးစီ သရေကျခဲ့ပါတယ်။ ပရိသတ် ၆၁၀၀၀ လာရောက်အားပေးခဲ့ကြတဲ့ ဟန်ဂေရီပရိသတ်တွေရဲ့ ဖိအားက အသင်းအပေါ် အကျိုးသက်ရောက်စေခဲ့ပြီး ဘယ်လိုကစားရမလဲဆိုတာ မေ့လျော့နေခဲ့ကြတယ်လို့ ဂရစ်ဇ်မန်းက ပြောပါတယ်။ 

“ကျနော်တို့ ကွင်းထဲမှာ အကောင်းဆုံးမကစားနိုင်ခဲ့ကြပါဘူး။ တိတ်ဆိတ်နေတဲ့ ပွဲကြည့်စင်နဲ့ကလည်း အသားကျနေကြပါတယ်။ ဒီအချက်က ကျနော်တို့ကို ရှုပ်ထွေးသွားစေပါတယ်” လို့ ဒီပွဲမှာ ချေပဂိုးသွင်းခဲ့တဲ့ ဂရစ်ဇ်မန်းကပြောပါတယ်။

ဟန်ဂေရီ သွင်းခဲ့တဲ့ အဖွင့်ဂိုးဟာ ၂၀၂၀ မတ်လနောက်ပိုင်းမှာ ပရိတ်သတ်ရဲ့ အကျယ်လောင်ဆုံးအသံ ဖြစ်ခဲ့ပါတယ်။