ဇွန်လ ၁၈ ရက်ညက ကန်သွားတဲ့ ယူရို ၂၀၂၀ ဘောလုံးပြိုင်ပွဲ အုပ်စုအဆင့် ဒုတိယ ပွဲစဉ်တွေမှာ  အင်္ဂလန်အသင်းကသရေကျပြီး  ဆွီဒင်ကတော့ နိုင်ပွဲရသွားပါတယ်။ 

အုပ်စု (D) ပွဲစဉ်အဖြစ် ဝင်ဘာလေကွင်းမှာ ကစားခဲ့ကြတဲ့ အင်္ဂလန်နဲ့ စကော့တလန်ပွဲစဉ်မှာ အင်္ဂလန်က ဘောလုံးပိုင်ဆိုင်မှုအသာနဲ့ ဂိုးကန်သွင်းခွင့် ၉ ကြိမ်လောက်ရခဲ့ပြီး စကော့တလန်ကလည်း ကန်သွင်းခွင့် ၁၁ ကြိမ်လောက်ရခဲ့ပေမဲ့ နှစ်သင်းစလုံး  ဂိုးဝင်အောင် မသွင်းနိုင်ခဲ့တဲ့လို့  ဂိုးမရှိ သရေကျခဲ့တာပါ။  ဒီပွဲရဲ့ အကောင်းဆုံးကစားသမားဆုကိုတော့ စကော့တလန် လူငယ်ကစားသမား ဂယ်လ်မော်က ရရှိသွားပါတယ်။ 

အုပ်စု (D) နောက်ထပ်ပွဲစဉ်တပွဲဖြစ်တဲ့ ခရိုအေးရှားနဲ့ ချက်တို့ ပွဲစဉ်တော့ တဖက် ၁  ဂိုးစီသရေကျသွားပါတယ်။ ဒီပွဲ ပထမပိုင်း ၃၇ မိနစ်မှာ ပက်သရစ်ရှစ်ခ်က ပင်နယ်တီကတဆင့် ချက်အသင်းအတွက် အဖွင့်ဂိုးသွင်းပေးခဲ့ပြီး  ခရိုအေးရှားအတွက် ချေပဂိုးကိုတော့  ပွဲချိန် ၄၇ မိနစ်မှာ ပါရီဆစ်က သွင်းပေးခဲ့ပါတယ်။

ဒီအုပ်စုက အသင်းအားလုံး နှစ်ပွဲစီကစားအပြီးမှာ  ချက်အသင်းက အုပ်စုထိပ်ဆုံးမှာရှိနေပြီး အင်္ဂလန်က အုပ်စုဒုတိယနေရာ၊ ခရိုအေးရှားက အုပ်စု တတိယနေရာနဲ့ စကော့တလန်ကတော့ အုပ်စုနောက်ဆုံးမှာ ရှိနေပါတယ်။  

အုပ်စု (E) က ဆွီဒင်နဲ့ စလိုဗားကီးယား အသင်းတို့ပွဲစဉ်မှာ ဆွီဒင်က ၁ ဂိုးဂိုးမရှိနဲ့ အနိုင်ရပြီး အုပ်စုထိပ်ဆုံးမှာ ရပ်တည်နေပါတယ်။ 

ဇွန်လ ၁၉  ရက်မှာတော့  အုပ်စု (E) က  စပိန်နဲ့ ပိုလန် အုပ်စု (F) က ဟန်ဂေရီနဲ့ ပြင်သစ်၊ ပေါ်တူဂီနဲ့ ဂျာမနီ အသင်းတွေ ယှဉ်ပြိုင်ကစားကြဖို့ရှိပါတယ်။

Photo Credit- Euro2020