မြန်မာ-ထိုင်းချစ်ကြည်ရေး အမှတ် (၁) တံတားတွင် BGF တပ်ဖွဲ့ဝင်အချင်းချင်း ပစ်ခတ်၊ ၂ ဦးသေဆုံး

Published By DVB | 1 July, 2021

မြန်မာ-ထိုင်းချစ်ကြည်ရေး အမှတ် (၁) တံတား လုံခြုံရေးယူတဲ့ နယ်ခြားစောင့်တပ်ဖွဲ့ဝင်အချင်းချင်း ရန်ဖြစ်ရာက ပစ်ခတ်မှုဖြစ်ပွားခဲ့တာကြောင့် ၂ ဦး သေဆုံးပြီး ၁ ဦး ပြင်းထန်ဒဏ်ရာရခဲ့တယ်လို့ သိရပါတယ်။

ဒီနေ့ မနက် ၁ နာရီလောက်က ကရင်ပြည်နယ် မြဝတီမြို့ မြန်မာ-ထိုင်း ချစ်ကြည်ရေးတံတားအမှတ်(၁)ကို လုံခြုံရေးယူထားတဲ့ နယ်ခြားစောင့်တပ်(BGF) တပ်ဖွဲ့ဝင် အချင်းချင်း စကားများရန်ဖြစ်ရာက ပစ်ခတ်မှုဖြစ်ပွားခဲ့တာပါ။

တံတားအမှတ် (၁)မှာ လုံခြုံရေးတာဝန်ကျနေတဲ့ (BGF) နယ်ခြားစောင့်တပ် အမှတ် (၄) တပ်နယ် တပ်ရင်း (၁၀၁၉) က တပ်ကြပ်ကြီး စောအဲ့ဝါးက ရန်ဖြစ်စကားများတဲ့ တပ်သားအဆင့်ရှိ စောမောင်အေးကို ကာပိုင်သေနတ်နဲ့ ပစ်ခတ်ခဲ့တာကြောင့် အခင်းဖြစ်နေရာမှာ သေဆုံးသွားပါတယ်။

အဲဒီ့နောက် စောအဲဝါးက တပ်သား အောင်ကိုကို ဆက်လက်ပစ်ခတ်ရာ အောင်ကို ပြင်းထန်ဒဏ်ရာရရှိပြီး သင်္ဃန်းညီနောင်စစ်ဆေးရုံကို ပို့ဆောင်ကုသမှုခံယူနေပါတယ်။

ပစ်ခတ်တဲ့ စောအဲ့ဝါးလည်း သေနတ်နဲ့ ကိုယ့်ကိုယ်ကိုယ် သတ်သေသွားတယ်လို့ မြဝတီမြို့ရဲစခန်းက အတည်ပြုပြောဆိုပါတယ်။

Independent media are under attack by the Myanmar junta. DVB continues reporting the facts, but needs support for the safety of our journalists. You help with any donation. Thank you.

Donate