ဧရာဝတီတိုင်း၊ မအူပင်မြို့မှာ ဇူလိုင် ၅ ရက်နေ့ မနက်ပိုင်းက အလယ်တန်းပြ ကျောင်းဆရာမ ၁ ဦး ကိုဗစ်-၁၉ ရောဂါနဲ့ သေဆုံးခဲ့တယ်လို့ သိရပါတယ်။

ကိုဗစ်ရောဂါနဲ့သေဆုံးခဲ့တဲ့ ကျောင်းဆရာမဟာ အမှတ် ၁ အခြေခံပညာအထက်တန်းကျောင်းမှာ တာဝန်ထမ်းဆောင်နေတာဖြစ်ပြီး ဇူလိုင်လ ၃ ရက်နေ့က အတည်ပြုလူနာဖြစ်ခဲ့လို ဆေးရုံတက်ရောက်နေတာလို့ ဒေသခံတွေကပြောပါတယ်။

သေဆုံးခဲ့တဲ့ ကျောင်းဆရာမဟာ ရောဂါအခံရှိသူဖြစ်ပြီး ကာကွယ်ဆေးထိုးထားသူဖြစ်တယ်လို့လည်း သိရပါတယ်။

မအူပင်မြို့နယ်မှာ ကိုဗစ်တတိယလှိုင်းအတွင်း ဇူလိုင် ၄ ရက်နေ့ထိ အတည်ပြုလူနာ အယောက်  ၆၀  ရှိနေပြီး  အဆိုပါကျောင်းဆရာမဟာ ပထမဆုံးသေဆုံးသူဖြစ်ပါတယ်။

ဧရာဝတီတိုင်းက ပုသိမ်၊ မြောင်းမြ၊ သာပေါင်းစတဲ့မြို့နယ်က စာသင်ကျောင်းတွေကို အကြမ်းဖက်စစ်ကောင်စီက ပိတ်ထားခဲ့ပေမယ့် မအူပင်မြို့နယ်မှာတော့ ကျောင်းတွေဖွင့်ထားပါတယ်။