အာဆီယံဒေသတွင်းနိုင်ငံတနိုင်ငံဖြစ်တဲ့ အင်ဒိုနီးရှားနိုင်ငံမှာ တရက်တည်း ကိုဗစ်- ၁၉ ကူးစက်မှုအသစ် ၄၀,၄၂၇ ယောက်ရှိခဲ့ပြီး ဒါဟာ နေ့စဉ်ကူးစက်မှုအမြင့်ဆုံး စံချိန်သစ် ဖြစ်လာခဲ့ပါတယ်။

ပြီးခဲ့တဲ့ ၂၄ နာရီအတွင်း သေဆုံးသူအရေအတွက် ၈၉၁ ယောက်ရှိခဲ့ပြီး လတ်တလောအချိန်ထိ သေဆုံးသူစုစုပေါင်း ၆၇,၃၅၅ ယောက်နဲ့ ရောဂါကူးစက်ခံရသူပေါင်း ၂ သန်းခွဲကျော်လာခဲ့ပြီ ဖြစ်ပါတယ်။

အင်ဒိုနီးရှား ရေကြောင်းနဲ့ ရင်းနှီးမြှုပ်နှံမှုဆိုင်ရာဝန်ကြီး လူဟတ်ဘင်ဆာပန်ဂျိုက်တန်ကတော့ ပြီးခဲ့တဲ့ ဇူလိုင် ၃ ရက်ကစတင်ကာ ဂျာဗားနဲ့ ဘာလီကျွန်းတွေမှာ အသွားအလာ ကန့်သတ်ထိန်းချုပ်မှုတွေ လုပ်ဆောင်ခဲ့ပြီး သေဆုံးမှုနှုန်းတွေ လျှော့ချနိုင်ခဲ့တာကို ထောက်ပြပြီး လာမယ့် သီတင်းပတ်အတွင်း ကိုဗစ်-၁၉ရောဂါ ကူးစက်ပျံ့နှံ့မှုနှုန်းတွေ လျော့ကျလာဖို့ မျှော်လင့်တယ်လို့ ပြောလိုက်ပါတယ်။

“ကာကွယ်ဆေးထိုးနှံတာ၊ အရေးပေါ်အခြေအနေတွေကို အရေးတယူ လိုက်နာတာ၊ ဆေးဝါး၊ အောက်ဆီဂျင်နဲ့ ဆေးရုံတွေ ပြင်ဆင်ထားရှိပြီး ကျနော်တို့ ဒီထက် ပိုမိုကောင်း မွန်တဲ့ အခြေအနေတွေကို တွေ့လာရမှာပါ”

အင်ဒိုနီးရှားနိုင်ငံဟာ ပြီးခဲ့တဲ့ ဇူလိုင် ၆ ရက်နေ့ကတည်းက နေ့စဉ် ကိုဗစ်-၁၉ ကူး စက်မှု ၃ သောင်းကျော်ပုံမှန်ရှိနေခဲ့ကာ အာဆီယံဒေသတွင်းနိုင်ငံတွေထဲ ရောဂါကူးစက်မှုနဲ့ သေဆုံးမှု အမြင့်ဆုံးနိုင်ငံ ဖြစ်နေခဲ့တာ ဖြစ်ပါတယ်။

အိမ်နီးချင်း မလေးရှားနိုင်ငံမှာတော့ တရက်တည်း ကိုဗစ်-၁၉ ကူးစက်ခံရသူအရေ အတွက် ၈,၅၇၄ ယောက်ရှိခဲ့ကာ နေ့စဉ်ကူးစက်မှု ပျမ်းမျှ ၉ ထောင်ကျော်ရှိနေတာထက် လျော့နည်းလာခဲ့ပြီး ရောဂါကူးစက်ခံရသူပေါင်း ၈၄၄,၈၇၀ ယောက် ရှိနေခဲ့တာပါ။

အာဆီယံနိုင်ငံတွေထဲမှာတော့ ကိုဗစ်-၁၉ သန်းချီကူးစက်ခံ အင်ဒိုနီးရှား၊ ဖိလစ်ပိုင် နိုင်ငံတွေပြီးရင် မလေးရှားနိုင်ငံက ရောဂါကူးစက်ပျံ့ပွားမှုအများဆုံး တတိယနိုင်ငံအနေနဲ့ ရှိနေပြီး အဲဒီနောက်မှာတော့ ထိုင်းနိုင်ငံက ရပ်တည်နေပါတယ်။