တိုင်းရင်းသား ဘာသာစကားလေ့လာရင်း စစ်ဘေးရှောင်ပြည်သူတွေကို လှူဒါန်းနိုင်မယ့် အစီအစဉ်တစ်ခုကို နွေဦးတက္ကသိုလ်က ဖွင့်လှစ်လိုက်ပါတယ်။

နွေဦးတက္ကသိုလ်က ဖွင့်လှစ်ပေးတဲ့  တိုင်းရင်းသား ဘာသာစကားတွေက ကချင်(ဂျိမ်းဖော)၊ အနောက်ပိုးကရင်၊ မွန်၊ ရှမ်း စတာတွေ သင်ကြားပေးတာဖြစ်ပါတယ်။

ကချင်ဂျိမ်းဖော နဲ့ ရှမ်းစာပေ သင်တန်းတွေက အတန်းသားပြည့်သွားပြီ ဖြစ်တာကြောင့် အနောက်ပိုး ကရင်နဲ့ မွန်တိုင်းရင်းသား ဘာသာစကားကိုတော့ တက်ရောက်လို့ ရနိုင်သေးတယ်လို့ နွေဦးတက္ကသိုလ် အဖွဲ့ဝင်တစ်ဉီးက ပြောပါတယ်။

အခုလိုမျိုး တော်လှန်ရေးကာလအတွင်းမှာ တိုင်းရင်းသားတွေရဲ့ ရင်တွင်းခံစားချက်နဲ့ သူတို့တွေရဲ့ အခက်အခဲတချို့ကို ဖြေရှင်းနိုင်ဖို့အတွက် တိုင်းရင်းသားဘာသာစကားတစ်ချို့ကို တတ်မြောက်ထားသင့်တယ်လို့ ဆိုပါတယ်။

တိုင်းရင်းသား ဘာသာစကားသင်တန်းမှ ရရှိတဲ့ အခကြေးငွေ အားလုံးကိုလည်း နိုင်ငံတစ်ဝန်းရှိ စစ်ဘေးရှောင် ပြည်သူတွေကို လှူဒါန်းပေးသွားမှာဖြစ်ပါတယ်။

နွေဦးတက္ကသိုလ်ဟာ စစ်အာဏာရှင်လက်အောက်မှာ ပညာမသင်ကြားလိုတဲ့ ကျောင်းသား လူငယ်တွေရဲ့ ပညာရေးရပ်တန့်မသွားစေဖို့နဲ့ တော်လှန်ရေးမှာ ပါဝင်ခဲ့ကြတဲ့ CDM ဝန်ထမ်းတွေ အပြင် လိုအပ်တဲ့နေရာတွေမှာ ကူညီထောက်ပံ့ပေးနေတဲ့ အဖွဲ့အစည်းတစ်ခု ဖြစ်ပါတယ်။