ဘူလ်ဂေးရီးယားနိုင်ငံအနောက်ပိုင်းက အဝေးပြေးလမ်းပေါ်မှာ မြောက်မက်ဆီဒိုးနီးယားနိုင်ငံသား အများစုဖြစ်တဲ့ ကမ္ဘာလှည့်ခရီးသည်တွေကို တင်ဆောင်လာတဲ့ ဘတ်စ်ကားတစီး တိုက်မိအပြီး မီးလောင်ခဲ့လို့ ကလေး ၁၂ ယောက် အပါအဝင် လူ ၄၅ ယောက်ထက်မနည်း သေဆုံးသွားပါတယ်။

သေဆုံးသူတွေထဲမှာ ဆားဘီးယားနိုင်ငံသား ၁ ယောက်နဲ့ ဘယ်လ်ဂျီယံ နိုင်ငံသား တယောက် လည်း ပါတယ်လို့ မြောက်မက်ဆီဒိုးနီးယား ဝန်ကြီးချုပ် ဇိုရန်ဇေ့ဗ်က ပြောပါတယ်။

မီးလောင်နေတဲ့ ဘတ်စ်ကားထဲကနေ ခုန်ထွက်နိုင်ခဲ့တဲ့ လူ ၇ ယောက်ကိုတော့ ဆိုဖီယာမြို့က ဆေးရုံဆီ အမြန်တင်ပို့ခဲ့ရတာပါ။ သူတို့ အခြေအနေ တည်ငြိမ်တယ်လို့ ဆေးရုံဝန်ထမ်းတွေက ပြောပါတယ်။

ဆိုဖီယာမြို့ အနောက်ဘက် ၁၉ မိုင်အကွာက အဝေးပြေးလမ်းပေါ်မှာ ယာဉ်တိုက်မှု ဖြစ်ရတဲ့ အကြောင်းရင်းကို မသိရသေးပါဘူး။ ဒါပေမဲ့ ဘတ်စ်ကားဟာ မီးမလောင်ခင် ဒါမှမဟုတ် မီးလောင်အပြီး အဝေးပြေးလမ်းဘေးက အရံအတားတွေကို ဝင်တိုက်မိခဲ့တာ ဖြစ်ပုံရတယ်လို့ ဘူလ်ဂေးရီးယား အရာရှိတွေက ပြောပါတယ်။

ဒါဟာ ဘောလ်ကန်ဒေသက နိုင်ငံ့သမိုင်းမှာ လူအသေအပျောက်အများဆုံး ဘတ်စ်ကား မတော်တဆမှုလို့လည်း ရိုက်တာသတင်းဌာနက ဖော်ပြထားပါတယ်။