ဂျာဗားကျွန်းတွင် မီးတောင် ပေါက်ကွဲမှုကြောင့် ၁ ဦးသေဆုံး၊ ၄၀ ကျော် ဒဏ်ရာရ
374
အင်ဒိုနီးရှားနိုင်ငံ ဂျာဗားကျွန်းပေါ်မှာ ဆေမေရူမီးတောင် ဒီဇင်ဘာ ၄ ရက်က ပေါက်ကွဲခဲ့တာကြောင့် ၁ ယောက် သေဆုံးပြီး ၄၁ ယောက် မီးလောင် ဒဏ်ရာတွေရခဲ့တယ်လို့ အင်ဒါမတ်စ်ဒါ မြို့ လူမာဂျန်ခရိုင် ဒုအကြီးအကဲက အွန်လိုင်းသတင်းစာ ရှင်းလင်းပွဲမှာ ပြောပါတယ်။
အာဏာပိုင်တွေက ကယ်ဆယ်ရေး ယာယီတဲစခန်းတွေကို ပြင်ဆင်ပြီးပြီလို့ ကပ်ဘေး လျော့ပါးရေး အေဂျင်စီ (BNPB) က ပြောပါတယ်။
ဒါပေမယ့် မီးခိုးထူတွေကြောင့် ဘေးကင်းရာ ရွှေ့ပြောင်းရေး လုပ်ငန်းစဉ်တွေ အနှောင့်အယှက် ဖြစ်နေတယ်လို့ (BNPB) ရဲ့ အကြီးအကဲ ဆူဟာယန်တိ်က ပြောပါတယ်။
ဂျာဗားကျွန်းရဲ့ အမြင့်ဆုံးတောင်ဖြစ်တဲ့ ဆေမေရူဟာ အင်ဒိုနီးရှားနိုင်ငံအတွင်းက မီးတောင်ရှင် အလုံး ၁၃၀ နီးပါးထဲက တလုံးဖြစ်ပြီး ဇန်နဝါရီက တခါ ပေါက်ကွဲခဲ့ဖူးပြီး အဲဒီအချိန်က အသေအပျောက် မရှိခဲ့ပါဘူး။
