မလေးရှားနိုင်ငံပိုင် ရန်ပုံငွေထဲက အမေရိကန်ဒေါ်လာ ဘီလီယံပေါင်းများစွာကို အလွဲသုံးစားလုပ်မှုနဲ့ ဝန်ကြီးချုပ်ဟောင်း နာဂျစ်ရာဇက်ကို မလေးရှား တရားရုံးတရုံးက ဒီဇင်ဘာ ၈ ရက်မှာ စွဲချက်တင်လိုက်ပါတယ်။

ဒါကြောင့် နိုင်ငံရေးထဲ တကျော့ပြန်ဝင်ရောက်နိုင်ရေး သူ့မျှော်လင့်ချက်ကို ထိုးနှက်သလို ဖြစ်ခဲ့ပါတယ်။

ဝန်ကြီးချုပ်ဟောင်းဟာ အဂတိလိုက်စားမှု စွဲချက် ၅ ခုထဲက တခုကို ရင်ဆိုင်နေရဆဲဖြစ်ပြီး ယုံကြည်အပ်နှံမှုကို ချိုးဖောက်မှု၊ အာဏာအလွဲသုံးစားပြုမှုတို့အတွက် ကွာလာလမ်ပူ တရားရုံးချုပ်က မနှစ်က ထောင်ဒဏ် ၁၂ နှစ်နဲ့ ငွေဒဏ် အမေရိကန်ဒေါ်လာ သန်း ၅၀ ပြစ်ဒဏ် စီရင်ခဲ့ပြီး သူက အယူခံဝင်နေတာပါ။

ဆုံးဖြတ်ချက်ချဖို့ တရားသူကြီး ၃ ယောက်ပါ အဖွဲ့ရဲ့ခေါင်းဆောင် အယူခံရုံး တရားသူကြီး အဘ်ဒူ ခါရင်းမ်အဘ်ဒူဂျာလစ်လ်က နာဂျစ်ရဲ့  စွဲချက်၊ စီရင်ချက်တို့နဲ့ ပတ်သက်ပြီး တရားရုံးချုပ်နဲ့ သူတို့ တညီတညွတ်တည်း သဘောတူတယ်လို့ ပြောခဲ့ပါတယ်။

သူ့လုပ်ရပ်အားလုံးဟာ နိုင်ငံ့အကျိုးစီးပွားအတွက်ပါ ဆိုတဲ့ ခုခံလျှောက်လဲချက်ကိုလည်း ပယ်ချခဲ့ပါတယ်။

“ငွေတွေ နိုင်ငံခြားကို ထွက်သွားခဲ့တဲ့ သက်သေ ရှိနေတယ်။ တရားသူကြီးတွေရဲ့ တွေ့ရှိချက်အရ ဒါဟာ နိုင်ငံ့အကျိုးစီးပွား မဟုတ်ဘဲ တကယ်တော့ အမျိုးသားရေး အရှက်တရားပဲ” လို့  ဒုအစိုးရရှေ့နေ ဗီစီသမ်ဘာရမ်က တရားရုံး ကြားနာပွဲအပြီးမှာ ပြောပါတယ်။

အယူခံလုပ်ငန်းစဉ်ဟာ အချိန် ၉ လထိ ကြာနိုင်တယ်လို့လည်း စီသမ်ဘာရမ်က သတင်းထောက်တွေကို ပြောပါတယ်။

နာဂျစ်ရာဇက်ကတော့ တရားရုံး ဆုံးဖြတ်ချက်ကို စိတ်ပျက်ကြောင်းနဲ့ မလေးရှားရဲ့ ထိပ်တန်းတရားရုံး ဖြစ်တဲ့ ပြည်ထောင်စု တရားရုံးချုပ်မှာ ဆက်ပြီးအယူခံသွားမယ်လို့ စီရင်ချက်အပြီးမှာ ပြောပါတယ်။

နာဂျစ်ဟာ ရာဇဝတ်မှုဆိုင်ရာ စွဲချက်ပေါင်း ၄၂ ချက်နဲ့ နိုင်ငံတော်ရန်ပုံငွေ အပါအဝင် တရားဝင် ၅ ရပ်ကို ရင်ဆိုင်နေရပေမဲ့ ဩဇာကြီးနေဆဲ ဖြစ်ပြီး လွှတ်တော်မှာ ပြန်ရွေးကောက်ခံမယ့်ကိစ္စကို မငြင်းထားဘူးလို့ စက်တင်ဘာလက ရိုက်တာသတင်းဌာနကို ပြောခဲ့ပါတယ်။