ချမ်းသာတဲ့နိုင်ငံတွေက ကိုဗစ်-၁၉ ကပ်ရောဂါ ကာကွယ်ဆေးကို အိုမီခရွန် ဗီဇမျိုးကွဲသစ် တိုက်ဖျက်ရာမှာ ကြိုးစားသုံးကြည့်ရင်း၊ ဆေးအာနိသင်ဆက်ထိန်းဖို့ ကိုယ်ခံအားမြှင့်တင်ရေး အတွက် သိုလှောင်ထားတာ မလုပ်ဖို့ ကမ္ဘာ့ကျန်းမာရေးအဖွဲ့ကြီး WHO က ဒီဇင်ဘာ ၉ ရက်မှာ သတိပေးလိုက်ပါတယ်။

ဒီလုပ်ရပ်ဟာ ကာကွယ်ဆေးထိုးနှုန်း နိမ့်တဲ့ ပိုဆင်းရဲတဲ့နိုင်ငံတွေကို မဖြန့်ဖြူးနိုင်ဘဲ ဖြစ်မယ့် ဘေးက ခြိမ်းခြောက်နေတယ်လို့လည်း ပြောပါတယ်။

WHO ရဲ့ ညွှန်ချုပ် တေဒရိုအဒါနွန် ဂေဘရီယေးဆပ်က “ကမ္ဘာကြီးဟာ ကာကွယ်ဆေး ပစ်မှတ်ကို ပြည့်မီတဲ့ လမ်းကြောင်းပေါ်ကို မရောက်သေးဘူး၊ အိုမီခရွန် ဗီဇမျိုးကွဲဟာ ကမ္ဘာကြီး ကြုံဖူးပြီးသား အခြေအနေကို ပြန်ပုံဖော်နေတယ်။ ကမ္ဘာလုံးဆိုင်ရာ ကာကွယ်ဆေး ထိုးနှံရေးအစီအစဉ် စကတည်းက ဝင်ငွေနိမ့်နဲ့ ဝင်ငွေ အလယ်အလတ်နိုင်ငံတွေ နောက်ကျ ကျန်နေရစ်တယ်”လို့ ပြောပါတယ်။

အနောက်နိုင်ငံအများအပြားက သက်ကြီးနိုင်ငံသားတွေနဲ့ ရောဂါအခံရှိတဲ့လူတွေကို ပစ်မှတ်ထားပြီး ကာကွယ်ဆေး အာနိသင် ဆက်ထိန်းတဲ့ ဆေးတွေ ထိုးပေးနေကြပေမဲ့ အမြန်ကူးစက်နေတဲ့ အိုမီခရွန်ဗီဇမျိုးကွဲနဲ့ ပတ်သက်ပြီး စိုးရိမ်နေကြပါတယ်။

အိုမီခရွန်အပေါ် လက်ရှိ ကာကွယ်ဆေးတွေ တိုး၊ မတိုးနဲ့ ပတ်သက်လို့ မေးခွန်းထုတ်နေဆဲပါ။ ဒါပေမဲ့ ကူးစက်နှုန်းနဲ့ နာမကျန်းဖြစ်မှု ပြင်းထန်နိုင်ခြေအပေါ်ကို အကြီးအကျယ် အောင်မြင်ကြောင်း သက်သေပြခဲ့ပြီးပါပြီ။

ကာကွယ်ဆေး ထိုးနှုန်းနည်းတာဟာ ပိုအန္တရာယ်များပြီး ကာကွယ်ဆေးဒဏ် ခံနိုင်တဲ့ ဗီဇမျိုးကွဲတွေ ပိုပေါ်လာနိုင်တဲ့ဘေးလည်း ရှိနေတယ်လို့ ဆိုပါတယ်။ 

အာဖရိက တောင်ပိုင်းနဲ့ ဟောင်ကောင်မှာ ပထမဆုံး ထောက်လှမ်းတွေ့ရှိခဲ့တဲ့ အိုမီခရွန် ဗီဇမျိုးကွဲ ကမ္ဘာပေါ်မှာ ကူးစက်မှု စုစုပေါင်းရဲ့ ၄၆ ရာခိုင်နှုန်းဟာ အာဖရိကတိုက်မှာလို့ WHO က ပြောပါတယ်။

လူဦးရေ သန်း ၁,၀၀၀ ကျော်ရှိတဲ့ အာဖရိကတိုက်မှာ လူ ၇ ဒသမ ၅ သန်းပဲ ကာကွယ်ဆေး ထိုးလို့ ပြီးသေးတယ်လို့ ရိုက်တာသတင်းဌာနက ဖော်ပြထားပါတယ်။