ထိုင်းနိုင်ငံမှာ ကိုဗစ်-၁၉ မျိုးစိပ်သစ်ဖြစ်တဲ့ Omicron ပိုးကို အမေရိကန်နိုင်ငံသား ခရီးသည်တစ်ဦးဆီက တွေ့ရှိတယ်လို့ ထိုင်းနိုင်ငံဆေးသိပ္ပံဆရာဝန်များအဖွဲ့က ဒီကနေ့မနက် ပြောပါတယ်။

အဆိုပါပိုးကို စပိန်နိုင်ငံကနေ ဝင်ရောက်လာတဲ့ အမေရိကန်နိုင်ငံသား အမျိုးသား ၁ ဦးဆီမှာ စစ်ဆေးတွေ့ရှိခဲ့တာဖြစ်ပြီး နောက်ထပ်လည်း တွေ့ရှိဦးမှာ ဖြစ်တာကြောင့် မတုန်လှုပ်ကြဖို့  ထိုင်းနိုင်ငံဆေးသိပ္ပံဆရာဝန်များအဖွဲ့ ညွှန်မှူး ဒေါက်တာဆူဖကစ် စီရီလတ်ဆနက ဒီကနေ့မနက် ၁၁ နာရီ ထိုင်းပြည်သူ့ကျန်းမာရေးဌာနအစည်းအဝေးမှာ ပြောပါတယ်။ 

အိုမီခရွန်နဲ့ပတ်သက်လို့ ထိုင်းမှာ ပြီးခဲ့တဲ့ ၂ ရက်၊ ၃ ရက်တုန်းက ကောလာဟလတွေရှိခဲ့ပြီး ပြည်သူတွေ တုန်လှုပ်တာကြောင့် ဆေးသိပ္ပံဆရာဝန်အဖွဲ့အနေနဲ့ အသေအချာစစ်ဆေးချက်တွေ ဆောင်ရွက်ခဲ့တယ်လို့ ဆိုပါတယ်။

အိုမီခရွန်စောင့်ကြည့်စစ်ဆေးမှုကိုလည်း ပြီးခဲ့တဲ့ နိုဝင်ဘာ ၂၇ ရက်နေ့ကစ ဆောင်ရွက်ရာမှာ အထူးသဖြင့် နိုင်ငံထဲဝင်ရောက်လာတဲ့ နိုင်ငံခြားသားတွေကို စစ်ဆေးခဲ့ကြောင်း၊ ပိုးတွေ့သူထဲမှာ အများစုက အယ်လ်ဖာ နဲ့ ဒယ်လ်တာ အမျိုးအစားတွေလို့ ဒေါက်တာဆူဖကစ် စီရီလတ်ဆနက ပြောပါတယ်။ 

အိုမီခရွန်တွေ့ရှိသူရဲ့ နမူနာကို ဆက်လက်ပြီး စစ်ဆေးသွားမယ်လို့ ဒေါက်တာဆူဖကစ်က ပြောသွားပါတယ်။

အိုမီခရွန်တွေ့ရှိသူဟာ အသက် ၃၅ နှစ်ရွယ် အမေရိကန်နိုင်ငံသား ထိုင်းအမျိုးသားဖြစ်ပြီး စပိန်နိုင်ငံမှာ ၁ နှစ်ကျော်နေထိုင်ခဲ့ကြောင်း၊ အလုပ်အကိုင်စီးပွားရေးသမားဖြစ်ကာ ပြီးခဲ့တဲ့ ဇွန်လက J & J ( ဂျွန်ဆဲန် အဲန် ဂျွန်ဆင်) ကိုဗစ်-၁၉ ကာကွယ်ဆေးထိုးပြီးသားလို့ ဆိုပါတယ်။ 

နိုဝင်ဘာ ၃၀ ရက်နေ့က ဒူဘိုင်းကနေ ဘန်ကောက်ကို ရောက်ရှိလာပြီး သူနဲ့ ထိတွေ့မှုရှိခဲ့သူမှာ ဟိုတယ်ဝန်ထမ်း ၁၇ ဦးနဲ့ လေဆိပ်ဝန်ထမ်း ၂ ဦးရှိတယ်လို့ ဆိုပါတယ်။