အင်္ဂလန် ပရီးမီးယားလိဂ်ကလပ်အသင်းသားတွေအကြား  ကိုဗစ်-၁၉ ရောဂါကူးစက်မှု ပိုမိုများပြားလာပြီး အခုတစ်ပတ်အတွင်း စစ်ဆေးမှုမှာ ၄၂ ယောက်  ပိုးတွေ့ရှိခဲ့တယ်လို့ သိရပါတယ်။

တချိန်တည်းမှာပဲ မန်ယူနိုက်တက်အသင်းသားတွေမှာ ပျံ့နှံ့လာတဲ့ ကိုဗစ်-၁၉ ကူးစက်မှုတွေကြောင့် ဒီကနေ့ညမှာ ကစားမယ့် ဘရန့်ဖို့ဒ်နဲ့ပွဲစဉ်ကို ရွှေ့ဆိုင်းဖို့ ပရီးမီးယားလိဂ်က ဆုံးဖြတ်ခဲ့ပါတယ်။

ပြီးခဲ့တဲ့ရက်ကလည်း စပါးအသင်းမှာ ကိုဗစ် ပျံ့နှံ့မှုတွေများလာတာကြောင့် ဘရိုက်တန်နဲ့ အဝေးကွင်းပွဲစဉ်ကို ပွဲရွှေ့ဆိုင်းခဲ့ရပါတယ်။

တနင်္လာနေ့အထိ တစ်ပတ်တာအတွင်း ပရီးမီးယားလိဂ်အသင်းတွေက လူ ၄၂ ဦးမှာ ပိုးတွေ့ရှိခဲ့ပြီး အများဆုံး တွေ့ရှိခဲ့တာဖြစ်ပါတယ်။

မန်ယူအသင်းအပြင် စပါး၊ လက်စတာ၊ ဝုဗ်၊ အက်စတွန်ဗီလာနဲ့ လိဒ်ယူနိုက်တက် အသင်းတွေမှာလည်း ကိုဗစ်ပိုးတွေ့ရှိခဲ့တာကြောင့် ပရီးမီးယားလိဂ်ကလပ်တွေအနေနဲ့ ကိုဗစ်ပျံ့နှံ့လာမှုနဲ့ ပတ်သက်ပြီ စိုးရိမ်နေရတယ်လို့ သိရပါတယ်။

ပရီးမီးယားလိဂ်မှာ ပြီးခဲ့တဲ့အောက်တိုဘာ ၁၉ ရက်အထိ ကိုဗစ်ကာကွယ်ဆေးထိုးပြီးသူ  ၆၈ ရာခိုင်နှုန်းသာရှိတယ်လို့လည်း သိရပါတယ်။