အာဂျင်တီးနား တိုက်စစ်မှူး ဆာဂျီယို အဂွဲရိုဟာ ဘောလုံးကစားတာကနေ အနားယူလိုက်ပြီလို့ ကြေညာလိုက်ပါတယ်။ 

အသက် ၃၃ နှစ်အရွယ် ဘာစီလိုနာ တိုက်စစ်မှူးဟာ ဒဏ်ရာပြဿနာအပြင် ကျန်းမာရေးချို့တဲ့တာတွေကြောင့် စောစောစီးစီး အနားယူသွားတာပါ။

သူဟာ မန်စီးတီးကနေ ဘာစီလိုနာကို ပြောင်းရွှေ့လာတာ ၆ လပဲ ရှိသေးပြီး ဘာစီလိုနာအတွက် ၅ ပွဲသာ ကစားပေးထားရပါတယ်။ 

တိုက်စစ်မှူး အဂွဲရိုဟာ ကစားသမား သက်တမ်းတလျှောက် ပွဲပေါင်း ၇၈၆ ပွဲ ကစားပေးထားပြီး ၄၂၇ ဂိုး သွင်းယူထားပါတယ်။

သူဟာ မန်စီးတီးမှာ ကစားတဲ့ ၁၀ ရာသီအတွင်း ဂိုးပေါင်း ၂၆၀ နဲ့ ဂိုးသွင်းအများဆုံး စံချိန်တင်ခဲ့ပြီး ဟက်ထရစ်ဂိုး ၁၆ ကြိမ် သွင်းယူခဲ့ပါတယ်။