ကရင်ပြည်နယ်၊ မြဝတီခရိုင် လေးကေ့ကော်ဒေသမှာ စစ်ပွဲကနေ ဘေးလွတ်ရာ တိမ်းရှောင်နေရတဲ့ ဒေသခံတွေ ထောင်ချီပြီးရှိနေပြီး ရာသီဥတုအေးတဲ့အတွက် အနွေးထည်၊ ခြုံစောင်နဲ့  အခင်းတွေ လိုအပ်နေတယ်လို့ လေးကေ့ကော်အုပ်ချုပ်ရေးမှူးရုံးကနေ သိရပါတယ်။

စစ်ကောင်စီတပ်တွေက ကေအန်ယူ တပ်မဟာ ၆ ထိန်းချုပ်နယ်မြေ လေးကေ့ကော်မြို့သစ်ကို ဒီဇင်ဘာ ၁၄ ရက်က ဝင်ရောက်လာပြီး မနေ့ကတော့ တိုက်ပွဲပြင်းထန်ဖြစ်ပွားခဲ့တာကြောင့်    စစ်ဘေးရှောင် ၁၀၀၀ ဝန်းကျင်လောက် ဘေးလွတ်ရာနေရာတွေကို ထွက်ပြေးတိမ်းရှောင်နေကြ ရတာပါ။

စစ်ဘေးရှောင်တွေအတွက် မနေ့က စပြီး လေးကေ့ကော် အုပ်ချုပ်ရေးမှူးရုံးကနေ ရိက္ခာတွေဖြန့်ဝေပေးခဲ့ပြီး ဒီနေ့လည်း တခြားနေရာတွေကလာတဲ့ အလှူရှင်တွေရဲ့ ပံ့ပိုးမှုနဲ့ ချက်ပြုတ်ကျွေးမွေးဖို့ ပြုလုပ်နေပြီလို့ သိရပါတယ်။

မနေ့မနက်ပိုင်း ပစ်ခတ်မှုမှာ စစ်ကောင်စီဘက်က အရာရှိတွေနဲ့  တပ်သားတွေ သေဆုံးခဲ့သလို စစ်ကြောင်းမှူးတယောက် ပေါင်ထိကာ၊ ဗိုလ်တယောက် လည်ပင်း ကျည်ထိမှန်ခဲ့တာ အပါအဝင် ဒဏ်ရာရသူတွေလည်း အများအပြားရှိတယ်လို့ သိရပါတယ်။

သေဆုံးခဲ့တဲ့ စစ်ကောင်စီတပ်ဖွဲ့ဝင်တွေရဲ့ အလောင်းတွေနဲ့ လူနာတွေကို သင်္ဃန်းညီနောင် စစ်တပ်ဆေးရုံကို လေးကေ့ကော် ကိုဗစ်စင်တာက လူနာတင်ကားနဲ့ လေးကေ့ကော် အုပ်ချူပ်ရေးက တာဝန်ရှိသူတွေကပဲ လိုက်ပို့ပေးခဲ့တယ်လို့ သိရပါတယ်။

မနေ့ညက စစ်ကောင်စီတပ်သားတွေ လေးကေ့ကော်မြို့တွင်းကနေ ပြန်ဆုတ်ခွာသွားပြီး ပစ်ခတ်မှုတွေ ဒီမနက်အထိ ထပ်မဖြစ်တော့ပေမဲ့ စစ်ကောင်စီတပ်တွေက အဝေးကနေ လက်နက်ကြီးတွေနဲ့ ပစ်ခတ်တိုက်ခိုက်မှာကို ဒေသခံတွေ စိုးရိမ်နေကြပါတယ်။