ဩစတြေးလျနိုင်ငံ တက်စမေးနီးယားပြည်နယ် အနောက်မြောက်ဘက်ရှိ Devonport က Hillcrest မူလတန်းကျောင်းမှာ ဒီဇင်ဘာ ၁၆ ရက်က ကျင်းပတဲ့ ကျောင်းအခမ်းအနားမှာ လေပြင်းတိုက်တာကြောင့် ကလေး ၄ ဦး သေဆုံးပြီး အများအပြား ဒဏ်ရာပြင်းထန်စွာ ရရှိခဲ့ပါတယ်။

မနက် ၁၀ နာရီလောက်မှာ ကလေးတွေ ဝင်ကစားနေတဲ့ လေဖောင်းရဲတိုက်ကြီး လေထဲ မြောက်တက်သွားပြီး ၁၀ မီတာလောက် (၃၃ ပေလောက်) အမြင့်ကနေ ပြုတ်ကျလာတာကြောင့် မူလတန်းကျောင်းနောက်ဆုံးနှစ်က ယောက်ျားလေးနှစ်ဦးနဲ့ မိန်းကလေးနှစ်ဦး သေဆုံးသွားပြီး နောက်ထပ်ကလေးအချို့လည်း စိုးရိမ်ရတဲ့အခြေအနေမှာ ရှိနေတယ်လို့ အာဏာပိုင်တွေက ပြောပါတယ်။

Hillcrest မူလတန်းကျောင်းမှာ ဖြစ်ပွားခဲ့တဲ့ အဖြစ်အပျက်ကလွဲလို့ ကလေးတွေ ဘယ်သူဘယ်ဝါ ဖြစ်တယ်ဆိုတဲ့ အသေးစိတ် အချက်အလက်တွေကိုတော့ မသိရသေးပါဘူး။

မူလတန်းကျောင်းနောက်ဆုံးနှစ် Year 6 က ကျောင်းသားတွေဟာ ပုံမှန်အားဖြင့် အသက် ၁၀ နှစ်၊ ၁၁ နှစ်အရွယ်တွေ ဖြစ်ကြပါတယ်။ 

ဒီအဖြစ်ဆိုး ကြုံရပြီးနောက် နာရီပိုင်းအတွင်း ကျောင်းသားမိဘတွေဟာ သူတို့ကလေးတွေ ထိခိုက်ဒဏ်ရာရရှိမှု ရှိ၊မရှိ ဘာအချက်အလက်မှ မသိရပဲ ကျောင်းတံခါးမှာ လာစောင့်နေကြပါတယ်။ 

“မနက် ၁၁ နာရီ ၃၀ လောက်မှာ ကျောင်းကိုရောက်ပေမယ့် သူနဲ့ တခြားမိဘတွေကို ဝင်ခွင့်မပေးဘူး” လို့ မိခင်တစ်ယောက်က Facebook မှာ ရေးသားထားပါတယ်။ 

အခင်းဖြစ်တဲ့နေရာကို ကယ်ဆယ်ရေးရဟတ်ယာဉ်နှစ်စင်းနဲ့ လူနာတင်ယာဉ်အများအပြားကို ဖြန့်ကျက်ချထားပြီး အခင်းဖြစ်ပွားပြီးနောက် ကျောင်းနဲ့ ဝေးဝေးမှာနေကြဖို့ ပြည်သူတွေကို ရဲတပ်ဖွဲ့က တိုက်တွန်းခဲ့ပါတယ်။ 

ဝန်ကြီးချုပ် Scott Morrison က ဒီအဖြစ်အပျက်ကို မထင်မှတ်ထားတဲ့ ကြေကွဲ ဝမ်းနည်းဖွယ်အဖြစ် ဖော်ပြခဲ့ပါတယ်။