ဩစတြေးလျအစိုးရဟာ တောင်ကိုရီးယားနဲ့ အမေရိကန်ဒေါ်လာ ၇၁၆ ဒသမ ၅ သန်းတန် ကာကွယ်ရေးသဘောတူညီချက်ကို ဒီဇင်ဘာ ၁၃ ရက်က လက်မှတ်ရေးထိုးလိုက်ပါတယ်။

စာချုပ်ပါ အချက်အလက်တွေအရ တောင်ကိုရီးယား ကာကွယ်ရေးကုမ္ပဏီ ဟန်ဟွာကော်ပိုရေးရှင်းက ဟောင်ဝဇ်ဇာအမြောက် အလက် ၃၀ နဲ့ ခဲယမ်းမီးကျောက် ဖြန့်ဖြူးမယ့် သံချပ်ကာယာဉ် ၁၅ စီးကို ဩစတြေးလျနိုင်ငံအတွက် တည်ဆောက်ပေးရမှာပါ။

ဩစတြေးလျစစ်တပ်က ခြေလျင်တပ်ရင်းတွေအတွက် တိုက်ခိုက်ရေးယာဉ်တွေကို တည်ဆောက်ဖို့ အစိုးရက စီစဉ်ထားတဲ့ ဩစတြေးလျ ဒေါ်လာ ဘီလီယံ ၃၀ တန် ကန်ထရိုက်အတွက် ဟန်းဟွာက ရှေ့ပြေးဖြစ်လာပါတယ်။

တောင်ကိုရီးယားသမ္မတ မွန်းဂျေးအင်းရဲ့ ဩစတြေးလျ နိုင်ငံဆီ ၄ ရက်ကြာ ခရီးစဉ်အတွင်း သတောညီချက် ရရှိခဲ့တာလည်း ဖြစ်ပါတဘ်။ 

တောင်ကိုရီးယား နိုင်ငံရဲ့ နည်းပညာ ကဏ္ဍအတွက် ဩစတြေးလျ နိုင်ငံထွက် ရှားပါးသတ္တုတွေ တင်ပို့နိုင်ရေး သေချာစေရေး နီးနီးကပ်ကပ် လုပ်ဆောင်သွားဖို့ သဘောတူခဲ့တယ်လို့လည်း နှစ်နိုင်ငံ အစိုးရတွေက ပြောပါတယ်။

တောင်ကိုရီးယားဟာ ၂၀၃၀ မှာ ကမ္ဘာ့ဘက်ထရီထုတ်လုပ်ရေး အချက်အချာနိုင်ငံ ဖြစ်လာစေဖို့ ကတိပြုထားတဲ့ ရှားပါးသတ္တု ပံ့ပိုးမှုကို လိုအပ်နေပြီး ဩစတြေးလျဟာ တောင်ကိုရီးယားရဲ့ သတ္တုတင်သွင်းမှု ၄၀ ရာခိုင်နှုန်းလောက်ကို ပံ့ပိုးနေတာပါ။

၂၀၅၀ မှာ ဖန်လုံအိမ်ဓာတ်ငွေ့ ထုတ်လွှတ်မှု သုည ဖြစ်စေရေး ကမ္ဘာ့စီးပွားရေးအင်အားကြီး နိုင်ငံတွေကို တွန်းအားပေးဖို့ လိုအပ်နေတဲ့ အစိတ်အပိုင်း အများအပြားအတွက် ဒီသတ္တုတွေဟာ အရေးကြီးပါတယ်။