တရုတ်နိုင်ငံခြားရေးဝန်ကြီးဌာန ပြောခွင့်ရှိသူ ဝေါင်ဝမ်ဘင်က အမေရိကန်က တရုတ်ကုမ္ပဏီတွေအပေါ် မကြာခင်က စီးပွားရေးပိတ်ဆို့မှုကို လုံးဝဆန့်ကျင်ကြောင်းနဲ့ အမေရိကန်တို့ရဲ့  မှားနေတဲ့လမ်းကြောင်းကို ပြန်ပြင်ပါလို့ တောင်းဆိုလိုက်ပါတယ်။

ဝီဂါလူမျိုးစုတွေအပေါ် လူ့အခွင့်အရေးချိုးဖောက်မှုတွေ ရှိတယ်ဆိုတဲ့ အကြောင်းပြချက်နဲ့ ဒရုန်း ထုတ်လုပ်တဲ့ DJI ကုမ္ပဏီအပါအဝင် တရုတ်ကုမ္ပကီပေါင်းများစွာရဲ့ တင်ပို့မှု၊ ရင်းနှီးမြှုပ်နှံမှုတွေကို ဒီဇင်ဘာ ၁၆ ရက်နေ့မှာ အမေရိကန်က စီးပွားရေးပိတ်ဆို့ခဲ့ပါတယ်။ 

ကမ္ဘာ့စီးပွားရေးအင်အားကြီး နှစ်နိုင်ငံကြား နောက်ထပ် တင်းမာမှုတွေ ဖြစ်လာတာပါ။  

တရုတ် DJI ဒရုန်းကုမ္ပဏီနဲ့  အခြားနည်းပညာကုမ္ပဏီတွေက  ဝီဂါမွတ်ဆလင်တွေကို biometric surveillance စနစ်နဲ့ ထောက်လှမ်းစောင့်ကြည့်မှုတွေ လုပ်နေတယ်လို့ အမေရိကန် ဘဏ္ဍာရေး ဝန်ကြီးဌာနက ပြောဆိုခဲ့ပြီး တရုတ်စစ်တပ်နဲ့ ပတ်သက်ဆက်နွှယ်မှုရှိတဲ့ ကုမ္ပဏီစာရင်း လူပုဂ္ဂိုလ်တွေ စာရင်းကို ထုတ်ပြန်ခဲ့ပါတယ်။

တရုတ်က ရှင်းကျင်းဒေသက အကြမ်းဖက်မှုတွေကို ငြင်းဆန်လိုက်ပြီး၊ အမေရိကန်ဟာ ပြည်တွင်းရေးကို ဝင်ရောက်စွက်ဖက်နေတယ်၊  တရုတ်ကုမ္ပဏီတွေကို အမေရိကန်စီးပွားရေး ပိတ်ဆို့မှုကနေ ကာကွယ်သွားမယ်လို့ ပြောဆိုလိုက်ပါတယ်။