စစ်ကိုင်းတိုင်း ရေဦးမြို့နယ်အတွင်း ရေနက်ရွာနဲ့ ဥယျာဉ်ရွာကြားအနီးမှာ ဒီဇင်ဘာ ၂၀ ရက် မွန်းလွဲ ၁ နာရီလောက် စစ်ကောင်စီဘက်က  ဂျက်လေယာဉ် ၄ စီးနဲ့ လေကြောင်းစစ်ဆင်တာတွေ လုပ်ခဲ့တယ်လို့ သိရပါတယ်။

ရေနက်ရွာနဲ့ ဥယျာဉ်ရွာဟာ ရေဦးနဲ့ တန့်ဆည်မြို့နယ်နှစ်ခုကြား ကပ်လျက်ရှိတဲ့ ကျေးရွာ နှစ်ရွာလည်း ဖြစ်တယ်လို့ သိရပါတယ်။

“နမခဘက်နေ လေယာဉ်လေးစီးနဲ့ ပစ်ခတ်တာဗျ။ ဘာကြောင့်ပစ်ခတ်တာလဲဆိုတော့ PDF စခန်း ရှိတယ်ထင်လို့ နေမှာပေါ့။ အခုလောလောဆယ်တော့ ဘာတွေ ပျက်စီးထိခိုက်တယ်ဆိုတာကတော့ မပြောနိုင်သေးဘူး” လို့ ဒေသခံရွာသားတစ်ဦးက ပြောပါတယ်။

တန့်ဆည်-ရေဦးနယ်စပ်တလျှောက် ရဟတ်ယာဉ်နှစ်စီးဟာ ရေဦးမြို့နယ်၊ ပန်းကုန်းရွာမှာ ဆင်းသက်ပြီးနောက် စစ်သားတွေချကာ နယ်မြေရှင်းလင်းဖို့ လုပ်နေတယ်လို့လည်း ဒေသခံတွေရဲ့ပြောပြချက်အရ သိရပါတယ်။

စစ်ကိုင်းတိုင်းအတွင်း PDF တွေ ခိုအောင်းရာနေရာတွေကို  စစ်ကောင်စီတပ်က လေယာဉ်နဲ့ရော မြေပြင်ကပါ ပြန်လည်တိုက်ခိုက်နေတာကြောင့် ဒေသခံတွေရဲ့ နေအိမ်တွေပါ ထိခိုက်မှုရှိ နေပါတယ်။

စစ်ကိုင်းတိုင်း ယင်းမာပင်မြို့နယ်မှာလည်း ဒီဇင်ဘာ ၂၀ ရက်နေ့က စစ်​ကောင်စီတပ်ဖွဲ့​တွေရဲ့ ပစ်ခတ်မှု​ကြောင့် ​ဒေသခံပြည်သူ  ၂ ဦး ​သေနတ်ထိမှန်ဒဏ်ရာရရှိခဲ့တယ်လို့ သိရပါတယ်။

ယင်းမာပင်မြို့နယ်အတွင်းက ​ကျေးရွာအချို့ကို စစ်​ကောင်စီတပ်​​တွေ ဝင်​ရောက်လာတာ​​ကြောင့် ​ဒေသခံပြည်သူ​တွေဟာ ​နေအိမ်​​တွေမှာ မ​နေရဲဘဲ ထွက်​ပြေးတိမ်း​ရှောင်ကြစဥ် စစ်​ကောင်စီတပ်ဖွဲ့က သေနတ်နဲ့ပစ်ခတ်ခဲ့မှု​ကြောင့် ဒဏ်ရာရရှိခဲ့ကြတာလို့ ​ဒေသ​ခံတွေက ​ပြောပါတယ်။ 

ဒီနေ့မနက်ပိုင်း သံဘို​ကျေးရွာဘက်က​နေ ဘန့်​ဘွေး​ကျေးရွာဘက်ကို လာ​ရောက်တဲ့ စစ်​ကောင်စီတပ်ဖွဲ့ရဲ့ ပစ်ခတ်မှု​ကြောင့် ပန်းတိမ်ပြင်​ကျေးရွာက ​မောင်ချမ်းလင်း​အောင် ရဲ့​ပေါင်မှာ သေနတ်ထိမှန်ဒဏ်ရာရရှိခဲ့တာလို့ ဆိုပါတယ်။

ဒါ့အပြင် ဘန်း​ဘွေး​ကျေးရွာက ဦးချစ်သန်း၊ ဦးချစ်ပို နဲ့ ဦး​ဇော်နိုင်တို့ရဲ့​ နေအိမ် ၃ လုံးကိုလည်း စစ်​ကောင်စီတပ်ဖွဲ့​တွေက ဖျက်ဆီးခဲ့ကြတယ်လို့ ​ဒေသခံ​တွေက​ပြောပါတယ်။ 

စစ်​ကောင်စီတပ်ဖွဲ့​တွေဟာ ယင်းမာပင်မြို့နယ်အတွင်းမှာ တပ်ဖြန့်သွားလာလှုပ်ရှား​နေတာ​ကြောင့် ​ဒေသခံပြည်သူ​တွေဟာ ​နေအိမ်​တွေမှာ မ​နေရဲကြဘဲ ထွက်​ပြေးတိမ်း​ရှောင်​ကြတဲ့ပြည်သူ ​သောင်းချီရှိတယ်လို့ သိရပါတယ်။

ဒီဇင်ဘာ ၁၉ ရက်​နေ့ကလည်း စစ်ကောင်စီတပ်ပစ်ခတ်မှုကြောင့် ဘန့်​ဘွေး​ကျေးရွာက ဖိုးပြူး(ခ)​မောင်မျိုးမျိုးဦး ရဲ့​ ခြေ​ထောက်မှာလည်း  သေနတ်ထိမှန်ဒဏ်ရာရခဲ့တယ်လို့ ဆိုပါတယ်။ 

ဒါ့အပြင် ​စစ်မှု​ထမ်း​ဟောင်းအများစု​နေထိုင်တဲ့ ​အောင်​ဇေယျကွက်သစ်(​ဒေသ​ခေါ် ​ရွှေ​တောင်ဦးကုန်း) မှာရှိတဲ့ စစ်​ဆေး​ရေးဂိတ်ကလည်း မုံရွာ-ယာကြီး-က​လေးဝ လမ်းသွားလမ်းလာ ပြည်သူတွေကို စစ်​ဆေးမှုတွေ ပြုလုပ်​နေပြီး အိမ်​ထောင်စုဇယား(သို့)မှတ်ပုံတင်တွေပါ ယူ​ဆောင်ခိုင်း​သလို စစ်​ဆေးခံပြီးမှ ဖြတ်သန်းသွားလာခွင့်ပြုတယ်လို့ ​ဒေသခံ​တွေက​ပြောပါတယ်။