ကမ္ဘာ့ နံပါတ်  ၁ တင်းနစ်သမားဖြစ်တဲ့ နိုဗက် ဂျိုကိုဗစ်ဟာ သြစတြေးလျနိုင်ငံမှာ  ရှေ့တပတ်ထဲ ကျင်းပမယ့် ATP ဖလားကို ဝင်ရောက်ယှဉ်ပြိုင်တော့မှာ မဟုတ်ဘူးလို့ ဆာဗီးယားမှာ ထုတ်တဲ့ သတင်းစာတစ်စောင့်မှာ မနေ့က ဖော်ပြပါတယ်။ 

ATP ဖလားမှာ ဝင်ရောက်ယှဉ်ပြိုင်မယ့် ဆာဗီးယားအသင်း လူစာရင်းမှာ ဂျိုကိုဗစ်လည်း ပါဝင်နေပေမယ့် သြစတြေးလျကို လိုက်သွားတော့မှာ မဟုတ်ဘူးလို့ သတင်းက ဆိုပါတယ်။ 

ဂျိုကိုဗစ်ဟာ ကိုဗစ်ကာကွယ်ဆေး မဖြစ်မနေ ထိုးရမယ်ဆိုတဲ့ စည်းကမ်းချက်ကြောင့် သြစတြေးလျ အိုးပင်း ပြိုင်ပွဲဝင်ဖို့ကိုလည်း မဆုံးဖြတ်ရသေးဘူးလို့ ပြောထားတာပါ။ 

ATP ဖလား ပြိုင်ပွဲမှာတော့ ဆားဗီယားအသင်းဟာ အုပ်စုအေမှာ နော်ဝေ၊ ချီလီ၊ စပိန်တို့နဲ့ ကျပါတယ်။ ပြိုင်ပွဲကို ဇန်နဝါရီ ၁ ရက်နေ့ကနေ ၉ ရက်နေ့အထိ ကျင်းပမှာ ဖြစ်ပြီး၊ တဆက်တည်း သြစတြေးလျ အိုးပင်းပြိုင်ပွဲကိုလည်း ဇန်နဝါရီ ၁၇ ရက်နေ့ စတင်ကျင်းပတော့မှာ ဖြစ်ပါတယ်။