အင်ဒိုနီးရှားနိုင်ငံ အနောက်ဆူမတ်တရာခရိုင် ဘီရူးကမ်းခြေနဲ့ မလှမ်းမကမ်းမှာ အမျိုးသမီးတွေနဲ့ ကလေးတွေအများစု ပါလာတဲ့ ရိုဟင်ဂျာလှေတစီး သောင်တင်နေတာကြောင့် အင်ဒိုနီးရှား အာဏာပိုင်တွေက လှေကို ပြုပြင်ပေးခဲ့ပါတယ်။

ဒါပေမဲ့ အင်ဒိုနီးရှားဆိပ်ကမ်းကို အကပ်မခံဘဲ အစားအစာနဲ့ ဆေးဝါးအပြည့်အစုံပေးပြီး ပင်လယ်ထဲ ပြန်လွှတ်လိုက်ပါတယ်။ 

ပထမဆုံး စတွေ့တဲ့ ငါးဖမ်းသမားတွေက “လှေကြီးပေါ်မှာ လူ ၁၂၀ ကျော်ပါပြီး ပင်လယ်ထဲ ၂၈ ရက် မျောနေခဲ့တယ်။ သူတို့ထဲ တဝက်လောက် ဖျားနေပြီး တစ်ဦး သေသွားပါတယ်” လို့ ပြောပါတယ်။

အင်ဒိုနီးရှားဟာ ၁၉၅၁ ခုနှစ် ကုလသမဂ္ဂ ဒုက္ခသည်များဆိုင်ရာ သဘောတူညီချက်ကို လက်မှတ်ထိုးထားတဲ့နိုင်ငံ မဟုတ်တာကြောင့် ခိုလှုံခွင့်တောင်းတဲ့ ဒုက္ခသည်တွေကို လက်ခံပေးလေ့ မရှိပါဘူး။

ပင်လယ်ပြင် ငြိမ်သက်တဲ့ ဧပြီနဲ့ နိုဝင်ဘာလတွေကြားမှာ ရိုဟင်ဂျာတွေဟာ အနီးဆုံး မလေးရှား၊ အင်ဒိုနီးရှား၊ ထိုင်းနိုင်ငံတွေဆီ ရွက်လွှင့်သွားလေ့ရှိပါတယ်။