ထိုင်းနိုင်ငံမှာ ကိုဗစ်-၁၉ ရောဂါအပြင် ကိုဗစ်ဗီဇမျိုးကွဲ အိုမီခရွန်ပါကူးစက်မှု ရှိနေပေမဲ့ နေရာတချို့မှာတော့ ၂၀၂၂ နှစ်သစ်ကူးကြိုဆိုပွဲတွေ ကျင်းပနေပါတယ်။ 

ထိုင်းနိုင်ငံ ဒုတိယမြို့တော် ချင်းမိုင်မှာတော့ ၂၀၂၁  နှစ်ဟောင်းကိုနှုတ်ဆက်ပြီး နှစ်သစ်ကိုကြိုဆိုတဲ့ ပွဲတော်ကို Royal Park Rajapruek တော်ဝင်ပန်းခြံထဲမှာ ဒီဇင်ဘာ ၂၇ ရက်မှ ၃၁ ရက်နေ့ထိ ၅ ရက်တာ ကျင်းပနေပါတယ်။ 

ပွဲကို ပန်းခြံထဲ ကျင်းပတာနဲ့အညီ သစ်ပင်တွေမှာ မီးအလှတွေထွန်းညှိ ဆင်ယင်ထားပြီး တေးဂီတဖျော်ဖြေပွဲ၊ ပြဇာတ်အကပဒေသာတွေပြသနေသလို ပွဲခင်းထဲမှာလည်း စားသောက်ဖွယ်ရာမျိုးစုံနဲ့ နှစ်သစ်ကူးအမှတ်တရ ဈေးရောင်းပွဲပါရှိပါတယ်။ 

Amazing Thailand Countdown 2022 - Amazing Newchapters @ Chiangmai လို့ အမည်ပေးထားတဲ့ ဒီပွဲတော်ကို ထိုင်းခရီးသွားလုပ်ငန်းနဲ့ ခရိုင်အုပ်ချုပ်ရေးဌာနတို့က ချင်းမိုင် ခရီးသွားလုပ်ငန်းမြှင့်တင်ရေးအတွက် ကျင်းပတာဖြစ်ပြီး ပြည်သူ့ကျန်းမာရေးဌာနက သတ်မှတ်ထားတဲ့ စည်းကမ်းနဲ့အညီ ကျင်းပနေတယ်လို့ ဆိုပါတယ်။ 

ပွဲခင်းဝင်ကြေးမရှိပေမယ့် ပွဲသွားမယ့်လူတွေဟာ  မိုဘိုင်း App ထဲမှာ ကြိုတင်စာရင်း ပေးသွင်းရမှာဖြစ်ပြီး ဝင်ခွင့်ရပြီးလို့ ပွဲခင်းရှေ့ရောက်တဲ့ခါမှာလည်း အရင်ဆုံး  ATK စနစ်နဲ့ ကိုဗစ်-၁၉ ပိုးစစ်ဆေးရမယ်လို့ ဆိုပါတယ်။ 

နှစ်သစ်ကြိုဆိုမယ့် ဒီဇင်ဘာ ၃၁ ရက်နေ့ညမှာ မီးရှူးအလှပဒေသာ ၉ လုံးတိတိ ပစ်ဖောက်သွားမယ်လို့ ချင်းမိုင်နယူးစ်သတင်းမှာ ဖော်ပြပါတယ်။ 

မြို့တော်ဘန်ကောက်မှာတော့ ထိုင်းအစိုးရအနေနဲ့ နှစ်သစ်ကူးပွဲတော်ကျင်းပမှာမဟုတ်ဘဲ ပုဂ္ဂလိကအနေနဲ့တော့ ကျန်းမာရေးဌာနက သတ်မှတ်ထားတဲ့ စည်းကမ်းချက်တွေနဲ့အညီ ကျင်းပနိုင်တယ်လို့ ဆိုပါတယ်။ 

ဘန်ကောက်မှာ အကြီးဆုံးလို့ဆိုရမယ့် Central World ကုန်တိုက်ကြီးမှာတော့ ခရစ္စမတ်မတိုင်ခင်ကတည်း အမှတ်တရဓာတ်ပုံလှလှရိုက်ကြဖို့ရာ 3D Virtual နဲ့ ခမ်းနားလှပတဲ့ မီးရောင်စုံတွေ ဒီဇိုင်းတွေ ဆင်ယင်ထားပြီး နှစ်သစ်ကူးပွဲကိုတော့ ပရိသတ်တွေ ဝင်ခွင့်မပြုဘဲ အွန်လိုင်းကနေ ဖျော်ဖြေရေးအစီအစဉ် နှစ်သစ်ကြိုဆိုပုံတွေ ရိုက်ကူးထုတ်လွှင့်ပေးမယ်လို့ ကြေညာထားပါတယ်။