ကိုယ့်ခြေစွမ်းအပေါ် အလုပ်နှင့်သက်သေပြရန် ဆုံးဖြတ်ထားကြောင်း ရက်ရှ်ဖို့ဒ်ပြော
ကိုယ့်ရဲ့ခြေစွမ်းအပေါ် ကျေနပ်မှုမရှိသေးတာကြောင့် ကွင်းထဲမှာ အလုပ်နဲ့ သက်သေပြသနိုင်ဖို့ ဆုံးဖြတ်ထားတယ်လို့ မန်ယူနိုက်တက် တိုက်စစ်မှူးရက်ရှ်ဖို့ဒ်က ပြောပါတယ်။
ရက်ရှ်ဖို့ဒ်ဟာ အခုနှစ်ရာသီမှာ ယူနိုက်တက်အတွက် ၃ ဂိုးသာ သွင်းယူထားပြီး သူ့ရဲ့ခြေစွမ်းအပေါ် ပရိသတ်တွေက ဝေဖန်မှုတွေရှိခဲ့ပါတယ်။
ယူနိုက်တက်ကစားသမားတွေရဲ့ ခြေစွမ်းအပေါ် ဝေဖန်မှုတွေ ရှိနေတဲ့အပေါ် ရက်ရှ်ဖို့ဒ်က ဆိုရှယ်မီဒီယာကနေတဆင့် တုံ့ပြန်မှုတစ်ခုပြုလုပ်ခဲ့ပါတယ်။
“ကျနော်တို့ရဲ့ ပေးဆပ်ကစားမှုအပေါ် သတင်းတွေမှာ ဝေဖန်နေကြတာက စိတ်ပျက်စရာကောင်းပါတယ်။ ကျနော်တို့ ခြေစွမ်းမပြသနိုင်ခဲ့ဘူး ဆိုတာမှန်ပေမယ့် အသင်းနဲ့ နည်းပြအဖွဲ့ဝင်တွေအပေါ်မှာတော့ အဆုံးမရှိတဲ့ လေးစားမှုရှိကြပါတယ်။ ခက်ခဲတဲ့အခြေအနေတွေ ရင်ဆိုင်နေရပေမယ့် ကိုယ့်ရဲ့တန်ဖိုးကို ပြသနိုင်ဖို့ ကြိုးစားနေပါတယ်။ ကျနော့်ဆန္ဒနဲ့ ဆုံးဖြတ်ချက်က အမြဲတမ်း အသင်းအတွက်ဆိုတာ ဘယ်တော့မှ မေးခွန်းထုတ်စရာမလိုပါဘူး။ ကျနော့် အသင်းကို ချစ်တယ်” လို့ ရက်ရှ်ဖို့ဒ်က ပြောပါတယ်။
မန်ယူအသင်းမှာ ပွဲထွက်ခွင့်ရတဲ့သူတွေက ခြေစွမ်းမပြနိုင်လို့ မပျော်မရွှင်ဖြစ်နေကြသလို ပွဲကစားခွင့်မရတဲ့သူတွေကလည်း အသင်းကနေ ထွက်ခွာချင်နေကြတယ်လို့ သတင်းတွေက ဖော်ပြခဲ့ကြပါတယ်။
